HALAWA

ليل بارد

2011-06-25T18:34:00.006+02:00

دخَلت ،

بضة متوحشة بنقاب ساتان ضيق ع اللحم وشبشب يكشف عن مونوكير فوشيا وبياض كريمي شاهق.

أخذت سيجارة من العلبة الملقاة على المكتب وبعض علب أدوية العينات بعد أن فرزتها جيدا وبعثرت مالا يتناسب مع ماتريد

النسكافيه ده بتاعك فهززت رأسي

أخذت شفطة رافعة النقاب بمواربة ليظهر جزء من صدرها

- ياه ده مر أوي

- باحبه كده

-اتعشيت ؟

-لأ لسه

-شوف هاتعزمنا على إيه ؟

-حضرِتك مين ؟

-أنا أمل ممرضة وردية الليل وهممت أن أعرفها بنفسي

عارفاك انت الدكتور اللي بيجيب شوكلاته ويحطها في فتحة التكييف عشان ما تسيحش .. احنا بقينا حافظينكو

بتاع الجرجير والفول والعيش أبو شلن

وبتاع الخمره والسجاير والنسوان

والشيخ بتاع ربنا والمصحف

وبتاع الشوكلاته والكانز النايتي اللي زي حضرتك

استغربت جدا وضحكت

أخذت موبايلي وطلبت اتنين بيتزا سي فود وسوسيس دون أن تسألني

وهي تتحرك بعيدا حتى لا أسمع باقي التفاصيل !!

-اتني منين يا أمل؟

-أنا من عين شمس ومتطلقه

استمر مسلسل الصدمة والرعب معي

-بس شكلك صغير ع الجواز أساسا

-آه عندي 24 سنه واتطلقت بعد اسبوع

ظهرت في خيالي كل السيدات اللعوب في الأفلام من ميمي شكيب إلى معالي زايد وإلهام شاهين مرورا بنبيله عبيد وناديه الجندي دون أن أنطق

كانت الساعة تجاوزت الثالثة فجرا وهي تجهز جلسة استنشاق أكسجين لنفسها بعد أن دخنت بعض السجائر وخاطري مشغول عن سبب طلاقها بعد أسبوع!!

فوجدتها فرصة جديدة لأكسب معركة الحديث

-لما انتي عندك حساسية بتشربي سجاير ليه ؟

نظرت لي مانت دكتور وبتشرب سجاير

وخيم الصمت ثانية

طلبت مني أن أسمع صدرها بعد الجلسة الذي هو إجراء روتيني ، فتوجهت لأرتدي جوانتي حتى لا ألمسها مباشرة كما هو معتاد بالنسبة لي

-انت كده و.. ؟

رفيع وشوكلاته وبيتزا ومابتحبش يبقى معاك ممرضات ستات شكلك مصدوم أو كدهون ؟ وهي تميل برأسها وتغمز بعينيها تحت النقاب .

أصبحتُ أكثر حدة في التحرك لأظهر لها وجها آخر لا أملكه،

أمسكت يدي وأنا أضع السماعة على صدرها ، نظرتُ خلفي للباب خشية أن يدخل أحد المرضى أو العاملين

خرجتُ لأستقبل الدليفري.أخذت العلب .أعطاني الفاتورة مكتوب فيها المبلغ المطلوب لأدفعه. أجدها باسم دكتور شاذ .

مـي / ماريــان

2009-12-20T20:17:00.002+02:00

رغم فرق الطول بينكو

إلا إنها بتصر

تآخدك بالحضن

في نص الشارع .

راسها

اللي نزلت

رشق في صدرك

كان ممكن تحتل

مكان مختلف

لو شغـّلت دماغـك

وخـليـتـها

تطلع فـوق الرصيف

أو عملت حجة رباط الجزمه

غريبه عليك

تيمة منزوع الشهـوه

بتخليك دايما

تمارس دور الأب

الـ غير شرعي

فتبوس راس أطهر رقبه

لِبسـِت آية الكرسي

وتحطها جنب الحيط .

ساقية الصاوي

2009-08-17T10:05:00.000+02:00

إن شاء الله
هشارك في مهرجان
ساقية الصاوي لشعر العاميه
يوم 25 أغسطس الساعه 9
قاعة بستان النهر
الدعوه عامه ويشرفني حضوركم

بص وطل

2009-06-13T02:33:00.003+02:00

مقال عن الديوان في موقع بص وطل

http://boswtol.com/aldiwan/nkasakees_252_02.html

نيجاتيف في المنصورة

2009-04-08T19:26:00.003+02:00

الديوان موجود دلوقتي
في المنصورة
في مكتبة بوكس آند بينز
أمام نادي جزيرة الورد
...........................
حفل التوقيع

الجمعة عشرة ابريل
الساعة سبعة
يشرفني حضوركم

روز اليوسف

2009-04-05T22:11:00.001+02:00

نيجاتيف

2009-03-14T15:32:00.000+02:00

حفل توقيع الديوان

الأربعاء خمسة وعشرين مارس

الساعه سبعة

في مكتبة البلد

أمام الجامعة الأمريكية
عن سلسلة
مطبوعات جماعة إضافة الثقافية
دار نشر المحروسة
تصميم الغلاف الفنان مجاهد العزب

عنكبوت

2009-01-04T23:58:00.004+02:00

مـرتكـِناً إلى الحائط
أحمل
زعافة الهموم
أقاوم
نهش العنكبوت
لوجوه خبت أضواؤها من الذاكرة
لم تعد البراويز الجبس
قادرة على منحها الخلود
اعذروني
يامن لاتخطئون
اعذروني
أيها المحلوبون من ضرع الطهر الميت
الذاكرة...ممتلئة

نزلـــِة عـشـق

2008-12-23T19:38:00.003+02:00

من فضـلِك
وانتي بتتمشي
في كورنيش القلب
اشتري حاجه ساقعه
م اللي ف تلج
واحلفلك
رغم الزحمه وبرد الخلق
هتشوفي أعظم سرعة بخر!!
كام خطوة موج
على قلب الصخر
اتحضنت شبكه
ولا طرحِتش..
وفنار مرعوش
مهزوم الضل
اترجى في نوره مايغرّقش..
من خطوِك .. نوّه
بتحدّف شوق مليون خماسين
بتخربش جرحي ب ملح سعاده
و اما أتبسملك..
واتفادى الريح بالروح شمسيه
استهوى لوحدي ب نزلة عشق
ينحسر الموج
وبجزر مفاجئ
عن شط خراب
وازاز متكسر
كورنيش مش قلبي
واتمدد وشم في لوحه حديد
ـ ممنوع الحلو يزور المالح ـ

سكايار

2008-12-20T19:58:00.003+02:00

افتقدته كثيرا
ذاك الشيخ الروش
كما كان يكره أن نلقبه
رغبته الدائمة
في تغيير الزيف
كانت تجبرنا
على شراء البيتزا والكوفي مكس
بكل نقودنا كالأطفال
نضحك ..ونعيث في الأرض غناء
نقلد كل الأصحاب
نتذكر الأموات
نصاب بهستيريا تفسير الشبهات
نرتكن

بالنظرة المفعمة بالرضا
إلى استفت قلبك

ومع وجود سابق إنذار

انزاح قلبي
عندما رحل لأداء فريضة الحج
إلى كعبة أبوظبي
........................
سنة سعيدة سكايار بطوطة وحشتوني

ربع قرن

2008-12-15T05:02:00.000+02:00

حاجه حلوه

2008-12-06T10:48:00.002+02:00

تعويـذه

2008-11-22T21:51:00.003+02:00

تعويذة الضحك
اللي اترسمت على شفه نبيتي
مش قادره تكون
ترياق السم
من آخر مره اتشك
في روحه ب ناب أزرق
والقلب سامعله
دقه زياده
كما ترس وداير
من غير زيت
زغرط بالصدى
لسنين دخان
حازه سنانه
صابح يجرح
بشرار العشق..
وليلاتي تزوره
كهربا رباني
واصله في غيره
قاطعه في ذاته
بتحاول تجلي سواد السم
وتزيح أكاسيده
اللي اتمدت
والقلب معاند
من غير قصد
حالف يتحجب ضد العشق

قلب استانلس

2008-11-20T05:24:00.004+02:00

ولإن النعمه
تقيله عليك
وقعت منك
فشت ع الأرض
واتبدر العقد المضفر
وخلصت أوام م التوطيه
وطلعلك بدل الأتب المتثبت
على نور الكدب
أجنحه ألامونيا
بتذيع هتافات
بصمة شوكك
ولاعدش بيغلط فيها اتنين
مبروك الروح
ملعون الروحه
مسموم النبضه
في قلب استانلس
من غير مصفاه
جاهز للبيع حته بحته
للي هيقرص يوم ع الزهر
محروق الكرت اللي هيشفعلك
تتحايل بيه وتخش الجنه

خراب

2008-11-02T23:17:00.010+02:00

ملعونه الروح
اللي بتسكن تربة جوفك
دون استئذان
تفضل تحتلك
تتسرسب
زي السرطان
...
وآديلك فتره
بتحاول تعزم روحك
ع الأفراح بالغصب
بتدور وسط خراب الخلق
على أي ملايه
خرقه قديمه
شنطه بلاستك
تعمل بيها مرمه لقلبك
جايز تحييك
جايز تشتاق
ترجع بني آدم
وتصلي فروضك تاني في جامع
من غير قسوه
شبح المذؤوب
اللي طلعلك
مستحلي يخربش دود الأرض
ويقلب تاني جروح
اتدفنت سابق
فن التأويل الطياري
من مشهد واحد
حبة بويا في شوية قش
هيروحوا الصبح بطلعة شمس
يبقوا تراب
مش فارقه معاك
ترجع بني آدم
ولانتش باقي
ولامستنظر
تتشفى ب ريحة اللي اتعفن

حي الجامعه

2008-09-28T09:41:00.001+02:00

سيب تعليقك لو عايز

دفاع عن النفس

2008-09-22T02:31:00.000+02:00

منعوتا بالخسة والعجرفة

تلك التهمة الموجهة حديثا

لأني أرفض

أن أحب إمرأة

لأنها فقط

جميلة

وأن أمتهن مهنة

لأنها فقط

شريفة

وأن أعتنق فكرة

لأنها فقط.. تعجبكم

أرجوكم

أيها الواصون

دعوني... أموت وحيداُ

أشرف توفيق

2008-08-24T22:47:00.001+02:00

حفل توقيع كتاب الانسان والفنان الجميل
المايسترو
أشرف توفيق
الوحيد اللي عزمني على كباب وكفتة
في مصر كلها
وأصر يصورني مش ذل
اوعوا تفهموا صح
عشان تبقى صورة ديواني الأول
بالتوفيق يا كبير
يوم الثلاثاء الساعة
سبعة ونص في مكتبة البلد

جدي مـاات

2008-08-18T11:09:00.000+02:00

وسط دخان السجاير
وسط عفرة الشيشات
قاعد أنا وسط الزباين
عمال بذاكر في الشيتات
راكز قوي تمثال ثبات
بسمع حكاوي المومسات
اللي بقولها الجارسونات
وكل ده والباب موارب
اللي نايم واللي قايم
واللي فايق بس شارب
ويا ترعيشة كهارب

كوبري طلخا

معـدي قارب
ساعة صفى وقت المغارب
جه خبر متعاص شتات
فـ كرهت كل التلفونات
- جدي مات -
سجلتها في دفتر الحالات
كان الموافق يوم تلات
- جدي مات -
سايب وصية تعليمات
خد بالك يابني م البنات
والبيبان والشراعات
والعيال والبلاعات
والإيجار والتقديرات
صابح دكر أستاذ حداد
مشروخ بداري

هم جوة كبدي بات

إيه آخرته مالدم مات
دول علموني أكون عبيط
وإني وسط الزحمة أزيط
وأما ساعة الحق تيجي
أتوه أنا في البزرميط
منيش جدع

أنا لخبطيط
فركة فرافيت الصميط
غطسانة جوة بق شاي
مليان برادة من حديد
راجل عشان كل البنات
حريف قهاوي وسيبرات
راشق في كل الكوك دورات
سامحني يابا ع اللي فات
ماتخفش تاني ع البنات
وخاف عليا
أنا اللي نصي مسخ مات

تغريدة البجعة

2008-08-08T16:29:00.005+02:00

أتمنى أن أغوص في الوحل
أريد الموت قذارة
أن أتطهر بالوَسَخ
فربما لن يتجنبني الوسَخ
ويظهر لي اشمئزازا
العلم والتنظير والبوتقة التي نعيش فيها
ونحتمي وراءها
عزلتنا عن العالم الحقيقي
صنعنا عالما آخر موازيا
ليس جميلا ولا محملا بالمُثل
بل عالما تافها متعاليا خاليا من الروح

رنة الفجر

2008-08-06T18:44:00.005+02:00

رغم إنك كافرة
بـ عشق الصبر
بتصرِّي ..
تـرني
- رنة حقيرة -
ساعة الفجر
جايز ..
تشفعلك
بس الغالب
مش ..
بسمحلك
تآخدي الأجر

سؤال

2008-07-29T19:04:00.002+02:00

تدفع لي كام
عشان أحطك
جوة قلبي
تسوى انت كام
عشان تبان
في صورة جنبي

حفل توقيع شباك الروح

2008-07-15T03:53:00.002+02:00

سلامو عليكو

ان شاء الله حفل توقيع
كتاب شباك الروح
الصادر عن دار إضافة للطباعة والنشر

يوم السبت

خمسة سبعة الساعة سبعة

في مطعم وكافيه ميراج بالمنصورة

الحاضر يعلم الغايب

وياريت تشرفونا جميعا

وتشتروا الكتاب
....................................
الكتاب موجود في السوق

القاهرة

عمر بوك ستورز - وسط البلد
دار المدى - أمام ريش كافيه
مكتبة مدبولي - ميدان طلعت حرب
مكتبة البلد - أمام مدخل الجامعة الأمريكية
الكتب خان - المعادي الجديدة ش اللاسلكي
فيرجين ميجاستورز- سيتي ستارز
مكتبة الشروق - سيتي ستارز

بلقاس

مكتبة الفارس - أمام حلواني المنير

المنصورة

بوكس آند بينز- أمام نادي جزيرة الورد
الطوخي.. شارع جيهان
أمام مصر للطيران
الأتوبيس الدولي ش جمال الدين الأفغاني
عبد الوهاب.. أول السكة الجديدة
السيد مصطفى.. أول توريل
دوران جديلة أمام الأمن المركزي
ش البحر بجوار بنك مصر

دكرنس ، المنزلة ، المطرية ، الجمالية
دمياط ، شربين ، بيلا ، فارسكور ، الزرقا

في أكشاك ومنافذ توزيع
جريدة الأخبار
في كل أنحاء الجمهورية

شباك الروح في المطبعة

2008-06-13T16:40:00.008+02:00

أحلى سلام
كتاب شباك الروح
دلوقتي في المطبعة
بيضم مختارات من أعمال أعضاء
جماعة إضافة الثقافية
لتقديمها في المجلس الأعلى للثقافة الشهر القادم
للنقد والمناقشة
هيبقى موجود في الأسواق قريبا
وإن شاء الله
في حفلات توقيع للكتاب
بس لسه بنظبط مواعيدها
............................
الكتاب بيضم
في الشعر
يحيى قدري ، محمد منصور صقر ، محمد رضا
أحمد عبدالله سليمان ، محمد أبوالفتوح الدسوقي
محمد عاصي ، أحمد الحديدي
سالم شبانه ، السيد عباس ، جمال حراجي

في القصة
محمد الجابري ، خالد سمره
محمد الحلواني ، أمجد الصبان
علي أحمد علي
ياسر الدالي ، نصر عبد الرحمن ، أحمد مطاوع

عـاصـي و رضـوى

2008-05-18T09:30:00.005+02:00

مـش هـقـول إني بـحِـبـك
مـش هـقـول إني أسـيـر
مـش هـقـول إن فـرِْحـي
بـ يـوم لـقـانا كان كـبـيـر

اللي فاكره يـوم ما شـفـتـِك
ساعتي وقـفـت
والعـقارب منها هـربـت
وابتدى الإحساس يغير
لما كتفك جه في كتفي
ابتديت أقيد وأطفي
واللي زاد البلة كسفة
إنك إنتي يا حـبـيـتي
قـلـتي آسـفة

جتني رعشة
زي خضة طفل صافية
أمه طالة بين ايدين
رمش جارح شعر سارح
خـد طـارح غـمـزتـين
كان ذنب مين ؟
يخلص عليا في ثانيتين

كنت عايش ليا وصلة
حتى لو دماغي فاصلة
دشي جنبي مرايتي بمبي
يوم لنانسي ويوم لهايفة
أحلى حاجة عينيا شايفة

قبلك انتي كنت تايه
وسط صحرا بدون ملامح
عـاصي شـارد
دمـعـُه بـارد
والحنان من قلبه رايح
مشتاق لـ رضـوى
في كل خطوة
تعلمه إزاي يسامح

وأما نورك جه حضني
تهت مني حبتين
روحي هربت
والأطباء فيها غلبت
ولا عدش نافع أتروبين
كان ذنب مين؟
يخلص عليا في ثانيتين

................................
عاصي ابن الناس الكويسين
الحمد لله
وجد رفيقة العمر د/ رضوى
خلي بالك منه يا دكتورة
الواد ده حونين أوي
هو طبعا بدأ يرمينا في الزبالة دلوقتي
بس مش مشكلة راضيين وربنا
خلوا بالكو من بعض وربنا يتمم بخير
وشكر خاص
لفتحي بيه وهدى هانم
ع الهدية الحلوة دي
وشهادة تقدير
لفريق مراجيح جديلة الاستعراضية
ووحدة ديجي والمكسر المرافقة
ولـ أحمد بك أبو اليسر
للمشاركة الوجدانية في القصيدة
وإلى الأمام دائما

شباك الروح .. أم نادر

2008-05-06T02:04:00.006+02:00

شباك الروح المتوارب
على مطبخ أمي
متشنكل عـشق وبـيغـبـّر
فـتـافيت م الشوق
بينادي عليا ويسألني
لـساك بتجوع
أول ما الست الغلبانة
بتـخش تـنام
وتقوم مفزوووع
لما بتتغير خطوتها
صوب الحمام
وبتدعي ليلاتي وبتفكر
يارب ما تترك فرشتها
والنور مقطوع
فـ اتآخر وأمشي بعيد عنه
يقابلني الباب
على كام حيطة تضـُم عـلـيا
كل الصناديق المقفولة
تـشـتـم فـيا
بتقول كداااااااب
مرايتها ..صورتها ..أجندتها
كل حاجتها ..فيها ريحتها
حتى الحقن اللي أخدتها
بتقول أغراب
اللمبة النايلون طراطيفها
مشبوحة سواد
عمالة بتسأل وتحايل
طرف السجاد
ليه بس الحلو يغيب عنا
ولا يفضلش غير الحـُسـاد
والراديو بيعلى وبيوطى
متمرد بوح
عمال بيهاتي وينوح
مستني حنان إيد الزبطة
المليانة الجروح
وشاويش الهمس المغزولة
في ضفاير شوق
قاعدة بتتمرجح في الأوضة
لقدام ولفوق
بتهز ملامح عناكبها
رافضة لوجوده في تركيبها
بتزعق فيه
فيرد بقوة جبروته
فتطاطي كلام كله مقطع
تتمنى الباقي يستنى
طيب خليه
سؤالات بتشكشك مساميعي
على كام ضحكة
على بق عياط
بتلم شتات عزف جماعي
فـيـّا بيتقاد
أول ماتمدد مطرحها
بتقوم الصورة وتطرحها
- تقرا صعيدي للآخر-
لساك زعلان يابن الغالية
ده انت ياواد أمك نادرة
اوعاك تزعل
لو يوم هيقولوا إنك بردان
وإن عيونك نشفانة دموع
دول بس يغيروا ياواد منك
حاسدين النفس اللي داخلك
منهم مقطوع
عارفاه القلب المتعاند
هربان الخوف
ولو إني برضه بـتمـندِل
حـسّاه مخطوف
البُكا متخلق في جوانحه
محبوس بـ الزوف
لساك حـرنان
بتحـرِّم قلبك ع النسوان
بتدور ع اللي بتشبهلي
وتشبه أمك
سوقهم خلصان
وتفك ضفاير ملهاش عـد
والمولد حبة وهيتفض
وهتستنى انت البردان
أما صحيح إنك غلطان
حتى في نومتي
شاغل فكري
ده انت يا ِولـدي
حفيدي البكري
اوعاك تزعل .......عايشة معاك
اوعاك تزعل....... هستناك
بس يا غالي هاتها معاك

معـرفـش لـيـه

2008-04-14T12:08:00.001+02:00

معـرفش ليه
خايف أوي
م اللي انتي رايحة تعمليه
هـتبيعي قلبي !!!
قصدي قلبك
لأي حد هتشوفيه
مش قصدي أهينك
لكن ودينك
عاجبك اللي انتي بتعمليه
صعبان عـليا
أشوف عينيا
أقصد عينيكي
ثانية واحدة مـقـفــّلة
عمالة تفرد في الدموع
زي الأسير متسلسلة
مش مشكلة!!!
ما يهمنيش!!!
اخترتي مين ليا البديل
لكن فضولي يشدني
ويهزني
الفرق بينا إيه ..كتير؟!!
زايد في إيه
أحسن في أيه
ما تطمنيني
قلبك انتي جراله إيه
مش عايز أعود
لكن بموت
لو كنتي يوم
محتاجة ليا ما جتلكيش
فـرّق ما بينا باب وشيش
وما شفتكيش
قلبي اللي عندِك بسأله
أخبارك ايه؟
عارف تسيبني وتـنـتـِشي
إخييييييييييييييييه عليه
مش عايـزُه تاني
بس يهـمـني
بستسمحك
وحياة دموعي يهمني
لو ثانية واحدة
جوة حضنه يضمني
بس أطمن عليه

خير اللهم اجعله خير

2008-04-03T04:00:00.010+02:00

اتـصـلـت بـيـّا امبارح

مـلـقـتـنـيـش

دورت عـلـيـّا عـنـدك

مـلـقـتـنـيـش
فوق الدولاب ...تحت السرير
في أي درج... في أي نيش
مـلـقـتـنـيـش

قـلـت أبعـت كلمني شكرا
ما طـلـبـتـيـش
طب أحـول رصيد

ما تـرديـش

الله..هو انتي فين

وأنا رحت فييييييين؟

وليه كل سكة أخشها

تحود يمين

واليمين بيجيب يمين

لما بتوصل مركبي
لنفس اليمين
والبحر ده بادئ منين؟؟؟؟

الله..هو انتي فين

وأنا رحت فييييييييين

خير اللهم اجعله خير

فـتـحي وهــدى

2008-03-15T03:30:00.011+02:00

كان نفسي
أكون لـِك كل حاجة
وأبقى في عنيكي
أحلى حاجة
مـا هـيّـا حاجة
عاملة بي حاجة
خلتني حاجة ....وكنت حاجة

كان نفسي أكون
برواز لصورتك
محطوط على جلدة كتاب
وأما تيجي الصبح خارجة
أبقى أنا
مراية الدولاب !!!!
تضحـكي لي
تـغـمزيلي
تفهـمـي عـقـدة جبـيني
فــ تـطـولي حـبـّة الحـجـاب

وانتي ماشية
تبقى عيني
حارسة روحك م العذاب
وأتـبـدر حـبـّة رقــاوي
تداوي جرح الاكـتـئاب
عارفة الصداع
حتى برشامة الصداع !!!!
لو يوم تحسي بالضياع

أبقى بـُوحك..وأبقى نـوحك
وأبقى لزقـاية لجروحك
تحزني
أملاكي فرحة
وأبقى قـفـلة نن عـيـنـك
نـص فـتـحـة
ويا غمازات خدودك
أبقى ضحكة ..وانتي سارحة

وأبقى مفتاحك لذاتك
ويا تـنهـيدة سـكـاتك
حتى سجـادة صلاتـك
يكفيني أطول بيكي الأمان

وأبقى بركانك وغضبك
وأبقى سـدك وأبقى مـدك
وأبقى مـركب غـاوية تـغـرق
لـجـل تعـبـر بـحـر ودك

وأبقى نورك وأبقى نارك
وأبقى ساعة الكسرة دارك
وان تهت يوم وضاع مدراك
تـهـديـني .. تدريجة سمارك

خايف أكون فاتتني حاجة
ولا كنت ليكي فيها حاجة
بس اللي عارفو في كل حاجة
إني بيكي صبحت حاجة
...........................................
أعتذر عن تأخري كان عندي
ظروف عائلية
وشكرا لكل اللي سأل عليا
دي هدية بسيطة
واعتذار لأني ملحقتش أعملهم أغنية
سي الضاكتور فتحي
صديقنا الغالي
والآنسة هدى بنت الحاج كامل
أخت الواد الضاكتور كيمو
البيت اللي آوينا من الشوارع
أكل إيه وماتشات وسينما
وأشكرها تاني لأنها وافقت عليه
ولمته من الشوارع رغم كل اللي تعرفه عن شلتنا
الصامتة الهادئة المبجلة
بجد كان من أسعد أيام حياتي
ويارب يديم عليكو الأفراح
ويحميكو من عيون الناس
شكر خاص لفرقة مراجيح جديلة الاستعراضية
عاصي و حسن و كيمو ومحمد يحي
على إحياء الحفل مجانا
ههههههههه

عريس حـبـيـبـتي

2008-02-01T05:30:00.002+02:00

عـريـس حـبـيـبـتي
وااااااد جــدع
من أبــو ظـبي
أبُــوه لِــوَااا
وأمُــه قـــال
ماسكالها حـي
يعـني بصراحة
عريـس عــسـل
مالـوهـش زي
لـو عـنـدي بنت
عـمـري يــوم
ما حُـوشها عـنـُه
وإن جاني واد
أتمنى يـطـلع
قـــد سِـنــُه
عشان يصاحبه
أو حتى يخطب بنت عـمُه
!!!!!!!!!
بـتـقـولي إيـه؟
هـترفــضـيه
تـسـتـني إيـه؟
تـسـتـني مـيـييييين
الأولاني
كان عـبـيـط
مربوط في ديل أمـُه بخـيـط
والتـاني
قـلـنا مـنـعـرفـوش
وساعـتـها كان وقت امتحان
بس ده
مش لاقي عـيـب
هقولك إيه؟
طب مين يـجـيـب لك
كـرواسون
وسيمـون فـيـمـيه
وجبنة ماركة أبصر إيه؟
أنا !!! أـــــــــــــــــ
مش هـو بـرضـه
ِاسمه إيه؟
إنما أنا هجـيب منين؟
ده أنـا لو هجـيـبلـك
كارت شحـن
مِـحْـتاج أحـوِّش جـُمعـِتـين
تسـتـني مـيـن؟!!!
مشكـلـتـك
إنك بنت ناس
حـتـة فراولة معـسّـلة
في الأناناس
اِزاي هـتـُعـصُر نـفـسَها
رابع ورا في الميكروباص
!!!!!!!!!!!!!
مش لايـقـة فيكي البهـدلة
والرقـص وسط المهـزلة
على لحـن مكسـور الميـزان
إجـبـاري فيه الأسـئـلة
وزمان قالوها في المثل
حـِبـي الـفـقـيـر
واِتبـسطـي بـيـه
وإن جـه غـني
اِوعـي تـسيـبـيه
بتـبُـصـي ليه؟
اتجوزيه ...اتجوزيه
اتجوووووزززييييه

مـش مكـتـوبـلي

2008-01-11T22:40:00.003+02:00

مش مكتوبلي
إني أتهجى سطور العشق
فــ نن عينيكي
ولا أتمنى دخول الجنة
بإذن إيديكي
وأما أتـجـرأ وأنطق اسمك
يسكت قلبي عـِنـداً فـيا
حـُـباً فـيكي

مش مقـسوملي
إن حـروف الكون ترسمني
عـُـقـد مْـدَلـّي
حارس روحــِك
قـادر يـِضوي فـ عـز العـتـمة
كسر جروحــِك

مش مسموحلى
إني أتـهـرّب وأحلم حـبـّة
بـرّة الــواقــع
بس الـكـبـســة
هههههههههه
سقـف المصري دايـمـن واقـــع

مـرة اتسرسـب
حـلم ف قلبي
بإني مزوغ
سايب شغلي
حاضن همي وطاجن ستي
تحت إقـلام البدلة الصيفي
ويا السمنة والبطيخة
واتنين كـيـلو
لـحـمـة بـيـفي
قاعد أوقع نص الحاجة
لجل ما أطلع أجـرة تاكس

فـتـقـابليني
تآخـدي الحاجة
تـرمـِي أكياسها في التلاجة
بـ وِش مْـصـدّي
أسـأل مالـِك ؟؟
ما نتش شايـف
قالـبة الشـقـة
خــش وعـدّي
أرخـّم تاني
إيه طـابخة لـنا
عـِنـْد تـرُدي
شوربة عـــدس

فجأة
الحلم صورته بـتـقطع
عايـز أطـمـع
تاني تاني
عيد م الأول
دوس رستارت
دوس رستاااااارت
لا مُمكن يرجع
أسمع صوت الست الوالدة
قوم يا حـبـيـبي
قوم يا صـغـنـن
من ع الأرض

عارف نفسي
الـشاب الـفـقـري
الـشايب بـدري
خريج بدروم الطـبـقة التـايـهة
وما نتيش تايـهـة
ُخـلـقي الضيق
خـلـّى جـدور الصدر تزيق

مش مستحمل تاني
أستجدي فـ بـُخـل مشاعر
قلبي اتـشـوّق
يـهـرب مني
لـ أحلى فـنـون الحب الـ
الحب الـ الفاجر
حـُب يـغـرّق ما يـمَـوتـش
حُـب بـيـدّي ما بـيـِحسِـبش
حُـب تحـس وانت فـ حـضـنه
إنك أغنى وأغبى طروبش
!!!!

شوفي يا ستي

اوعي تخافي ثانية عليا
عـُمـر الحب ما كان ترضية
مش مكتوبلي أو مسموحلي
ربـك قــدّر
بس أنا عندي روح رياضية

سـوبـر جـيـت

2007-12-27T08:35:00.002+02:00

وسط إزاز السوبر جيت

صورتك طـِلعت

فـ اتخـضـيـت

قلت دي يمكن

عـيـّلة تايهة

نازلة ف نشرة

غابـت فـتـرة

بـرة الـبـيـت

قـُمت أدّارى

في أي سـتارة

جـايز العـيب ده

م النضـارة

نفس الصـورة

قاعـدة بـتـكـبر

عـاملـة مجـال

زي مجــال

الضغـط العـالي

يمــين وشمـال

يسحـب فـيـّا

فـ اتـشـديـت

واتدهـولـت واتـثـبـت

واتـرجـيـت

كان إيـه طـلـّعـني

بـرّة البـيـت

امشي يا بـت

ما بتمشيش

امشي يا سـتـي

ما بتمـشـيـش

طـبـعـي السـّـو

لـو زاد حـبـك

سَـنـْـتي ف قـلبي

بعـمل فيها عـم العــوْ

تـجـري تـخـافـي

أشقى ف بعـدك

أقـــوم أحـلـــوْ

تضحكي ضحكة

تـشـك الـقـلـب

تـشـق الغـيـم وتحـلـّي الجـوْ

وحياة نـن العين السارح

ويـّا كتاب العمر المالح

كوني بْـحُـبك مـا تجـبّـيـش

ليه تـتـنـازلي
أو تـتـكـسـفى
ما تـخـــــبــيـش

حتى ان كان الرد مفيش

قلبي هيقبل يـبقى أفـيـش

حاسـس إنك روح

من توبي

عاشقة ...وخايفة

تيجي تـطـهـّر كل ذنوبي

عمري ف يوم

ما احتجت لحد

غصبن عني

كنت بـكـبـّر بيننا السد

طوبة بهجـْر وطوبة بـود

بس المـرّة... أنا بستهبل

بس بجد

يخرب بيته السوبر جيت

حـــدائــق الـمـعـادي

2007-12-15T16:05:00.000+02:00

بـزهـَـق مني
كل ما شوفـني
جــوّة مرايتي
بنـفس الشـكل
شـرخ ونـازل
تحـت الحاجـب
فاصـل وشـي
اتنين بالـمِـثـل
قاسم الشفة والنظارة
جاي بالـوَرْب
لعْـرفـت أضحـك
أو حـتى أبـكـي
خش بسيفه جوة القلب
ينـغـز نـغـزة... تـنطر دم
اتعـاص عـلـقـم
لما استـشرى طعـم السـم
فرق بيوسع
شرخ بيقطع
من غير ذنب
عمال يفرد وبيتمطع
ابن اللللللل
سهواً عني ..وقعت مني
عين والتانية
من غير نني
وشي اتدغدغ
راح ع الأرض
وأنا مستغرب
عايز ألـِمـه
قبل ما رجل تدوس ع الأرض
مكسور خاطـري
مين يستـجـري
يكسر عيني؟؟؟
عايش الدنيا
طالع ...عيني
لكن رزقي
ع اللي حاميني
أصل حصان البخت ..مـقـيـّـل
لو يوم يجري
فجأة في آخـر السـكـة يريـّـل
آآآآآآآه يا مـنـيـل

قـلـت بـفـرض
هرسم وش جديد بالعرض
دايرة كبيرة
تكون إريجـولـر
ساكن فيها عيوني الجـوز
لو يوم شافت تعمى وتخرس
وتقول موووووووز
جه ف وسطيهم واحد نـوز
م الـتـرايـنـجـــل
حازز فيها كام كام أنجل
جاي تـحـتـيـهـم
ون مـوسـتـاش
مش م العـيــرة
قادر يركب ع التكشيرة
مالي حدودها
بـــق بيضحــك
بق بيضحك م البيضاوي
ماركة سوستة مهمن يحصل
يضحك برضه مداري بلاوي
كنت راح أنسى
الهيد فـون والإم بي ثـري
مطرح ودني أمـّال إيه؟

حـبة بـاودر
باللون الأحمر
أيـون أكـتر...ابـدر أكتررر
كتر كترررررر

يـبـقى الشـكـل
يبــقى الــوش
جديد في جديد
جايز يعجب
جايز ينفع
جايز يطلع بكرة العـيـد
..................................

من يومين في المعادي
بقيت بقول انجليزي
أمال لو طولت شوية
هههههههههه
الدنيا هنا لوز اللوز
غير بلدكو المعفنة
مش عايز أرجع
بس المشكلة فعلا
مفيش سيبرات
لأن كل واحد عنده في بيته
مش شحاتين ناس مملة بجد
ايه الناس الأغنياء دي
بقالي أسبوع بدور على سيبر
أخيرا لقيت في حتة معفنة
م اللي بحبهم شبه ميت حضر
وزحمة وزبالة ودخان وقهاوي
شكرا ليكم جميعا
زي النهاردة
غميت الدنيا بطلتي
بس كان لازم حد يجي يقرفني
بعدي بخمس أيام سكايار
وزي النهاردة من سنة
اتولدت
حلاوة جوانا أو جوانا حلاوة
الحمد لله
عيد سعيد عليكم جميعا
ومبروك عليكم
يا للي عارفين نفسيكم
وربنا يسامحنا ع الجريمة
اللي عملناها في حق البشرية
يارب ديم علينا رضاك

هــبــل في الـجـبـل

2007-12-02T13:08:00.000+02:00

احساس رائع انك تحس انك عبييييييييط
في الدنيا دي وكل الناس تبقى مستفة حاجة
ليك وانت واقف تتفرج مش فاهم
بس طعم المفاجآت الصادمة
الملتهبة بالذات للأشخاص الخزعبلية
بيبقى حلو جددددددددددددددددددن
امبارح خير اللهم اجعله خير
نايم بدري على غير العادة
وكنت هسافر مصر
بعد لما خلصت امتحانات
ولكن حصلت ظروف ودخلت نمت
صحيت الصبح على غتاتة عاشق الروح
اصحى يابني الساعة اتناشر
في ايه ياعم أنا عايز أنام
بقالي كتير مطبق نفسي أنام
عايزك ضروري
ياسيدي سيبني بقى غوووور
والواد كوكو الضعيف في خلفية الكلام
قاعد مسخسخ
من الضحك مش فاهم ليه
بصيت في الساعة لقيتها سبعة صباحا
ودي أول كدبة عادي مش مشكلة
أنا السبب علمناهم الكدب
سبقونا ع الابواب
قلت حسبي الله وقمت أغسل وشي
وإذ بي وأنا ماشي في الصالة
لقيت واحد ماشي كده جنبي
لابس هدومي
قلت خير
يمكن أنا مقابلني
أو مشفتنيش قبل كده
أو يطلع كلام أمي صح
إني بمشي بالليل وبروح حتت تانية
زي سعاد حسني في بئر الحرمان
أو انفصام شخصية الصبح دكتور وبالليل رقاصة
ركزت تاني في اييييييييه
ايه اللي بيحصل فكرت أقرصني ؟
ولقيت كل الناس بتضحك عليا
الواد ده اللي لابس هدومي
مش أنا
آخر مرة شفتني مكنتش كده
هو صحيح من زمان مبصتش في مراية
بس أكيد مش هتحول كده
لقيته آه البني آدم أنا عارفه
ده الطويل الرفيع أبو دقن
أيوة صاحبي لابس هدومي
أنا زعلت على هدومي اللي هتنضف
طيب هو جه هنا ازاي ؟
هي الامارات فتحت فرع جديد في مصر
ولا ضموا إمارة الدقهلية ع الامارات
ايه اللي جاب القلعة جنب البحر
وقفت مذهوووووووووووول جدن
وهو قاعد يتنطط وعاشق فطسان
وأمي واخواتي بيضحكوا
سامع صوتهم من الدور اللي تحت
واللي مزود الصدمة
انه قايل انه مش جاي
الكذب ده حاجة لذيذة بجد ههههه
بجد مبسوط جدن فرحان قوي
روحي رجعت لي
مفاجأة خزعبلية لوزعية خلفشعية
حمد الله ع السلامة يا سكايار
ولو سمحت رجع هدومي اللي سرقتها أحسن لك

أبـويـا .. في الخليج

2007-11-17T05:21:00.002+02:00

معرفش ليه كل أما أشوفك

بحِـس إن اليوم سعيد
بلقانى فـرْح طارح في قلب
خلالى ليلة الحزن عيد
يمكن بـعـيد
لو يوم أنا أقـدر أزيـد
بس الأكيد
حـُبك سَاكــن لي في الوريد
وحشاني صورتك ع الحيطان
رغم إنها في نفس المكان
لكن تبان كـِـبرت قوي
من يوم مارحت ده الخليج
إياك تكون فاكر قوي
شرخة دموعي بتـتـلوي
بجهاز جديد
أو نوكيا م النوع العنيد
خلاط عشان ست البنات
شنطة وجيبة وغويشات
غلطان كتير غلطان قوي
ده كل لحظة بـتـنـِزوي
في ست عايشة بـتـتـكوي
بتشيب عـَجـَز
عـمّالة تـجـري وتـتهرس
حاضنة دموع صوت النفس
لو يخفى يوم طعم الونس
أو تيجي جـُـثـة مـمـددة

فــاكـر زمــان
لما تجيب لي فروت سلات
من عند ده اللي اسمه البارون
وأروح وأجيب بفلوس كتير
حلاوة نوع الشيكوبون
لـغـمطـت وشي بألف لون
تضحك تقوللي عليك جنون
حسيتها بيك ريحة الأمان
وانت كمان
تلقاني ليك ظهر وحنان
يسوى ده كام
كـيـلـو الحنان
ولا الأماني والأمان
تضرب لي سعـر
هــزيد عليه
السهم طالع ولا نازل ولا إيه؟
يسوى ده كام
انك تعيش ملكش أرض
عمال تـلـِف من السنين
في حلـم فـرط
جربت تحضن فيزا كارد؟؟
جربت أحضن فيزا كارد
ردوا الحنان ملهش قـرض
ازاي تـعـِد سنين طوال
سـتــْـرَالـي عـــرض
حتى أما شفت
البنت ليها
قـلبي ماااااااااااااال
خـُفـت أبـتـلـيها بالعيااال
ونعـيـدها نفس التجربة
وأهرب وأسيبها ع الخليج
باين نسيت
حتى في زمـــاننا
مفيش خليييييييييج

الولاد كبرت

2007-11-12T15:00:00.002+02:00

صباحه فل على الناس اللي مشرفانا

بقالي حبة عايز أبعت بوستات

بس مش قادر رغم ان في قصايد

بس مليش نفس من بعد الباطنة
أصبت بحالة عقم تهديفي
زي الأهلي كده الله ينصره على مين يعاديه
فقلت أسلم ع الناس اللي وحشاني
ومشفتهمش بقالي زمااااااان

نبتدي بالمايسترو سكايار
اللي هوة الجعان اللي ع اليمين
هو دلوقتي في الامارات ربنا يوفقك يا ملك
وتتبدل الأمور أحسن
وتلاقي الخير في أي مكان ان شاء الله في جيبوتي
فاكر الصورة دي يااد لما كنا في سيدي بشر
وحشتني بجد رحت نيو ايميدج امبارح
بقالي شهرين يمكن معتبتهاش
الناس هناك بيسلموا عليك جميعا
واحنا كلنا عايشين متقلقش على حد

أما شحاتين السيدة اللي ع الشمال

الواد الدكتور اللي ساكن ع الشارع
رفيق الدرب صاحب بلوجاية مفيهاش ولا بوست
لكن بيجيلوا كومنتات منين متفهمش
قدرة ونفاذية الواد ده واااااااصل
من كتر قرايته لأحمد خالد توفيق
الكومنتات بتيجي لوحدها ههههههههه

اللي جنبه الدكتور مستكنيص الصحفي الكبير
ربنا يوفقك يابني
انت عملت اللي أتخن تخين تعرفه معملوش
بيكتب في مجلة اسمها احـــنــا
هي صحيح قهراوية بس
لكن مش مشكلة اي يعني دوس ياواد
وبلاش تحطم نفسك بنفسك
كبر أي نص فرصة تجيلك لأنها مش هتيجي تاني
وبلاش تبقى على أي علاقة
لو فيها شك انها هتجيبك لتحت
حب نفسك أكتر هتعرف تحب الناس صح
واعرف الناس اللي تزق لقدام ده الأهم
من دراما الماضي الجميل وهاني شاكر وكدهون
انت دلوقتي اسمك محطوط جنب العسيلي ومروان قدري
متخسرش ده أبوس قبة ودنك من فوق

نيجي للواد النونو الطويل مامادو
دلوقتي بقى لاعب باسكت في الانتاج الحربي
وبدأ يدوس في الحياة ويكبر ربنا يوفقك
وفرحان بيه جدن ويتعلم من تجارب الكبار
علشان ميبدأش من الصفر وده رائع بجد
الله يسهله سموحة وهيلتون من بعد كهرباء طلخا
لااااااااااتحسد دوس ياجميل

نيجي بقى لنساء العالمين وحسبنا الله ونعم الوكيل

صوحفية جديدة برضه حاجة تشرف بجد
الانسانة دي بحترمها جدن المايسترو جميلة بو حريد
خلي بالك من روحك في دنيا العالم اللي ملهاش حدود دي
ويارب نشوفك حاجة كبيرة

أما الكوم التقيل التقيل جدنننننننننننننن
ديو برايت
بقت مدرسة ثانوي انجليزي ياوااااااااد
يا خوفي ع العيال منك يا قدرة اقضي ع الرجالة كمان وكمان
بالتوفيق يا باشا في حياتك الجديدة
هي صحيح جت على قفانا احنا اننا مش هنشوفك
بس أكيد مصلحتك تهمنا ربنا معاكي
................................

مش من حقـِك

2007-10-17T22:01:00.002+02:00

مش من حقـِك
رغم الجرح الساكن قلبك

إني أحبك

وإني أكون تلبيسة لقلبك

نكدب بيها لجل تطولي

صدق عواطفك

عارف شرطك
إني أخطي الصعب لشطك
وأدفع تمن القرب كرامتي
لا ياحبيتي مش من حقك

متعودتش أكون شماعة
ولا أتبدل وسط بضاعة

أو أتصفى في آخر ساعة
وقت رضاكي بالقطاعة

قلبي اتعود يملك أمره
صوت العقل هو أوامره
وإن كان حبك غاية عمره
هعـصُر قلبي وأشرب دمه

عارف دمعي بيكوي في جلدي
بس نزوله لروحي طهارة
وأنا من جهلي وخيبة أهلي
بصطاد حبك بالسنارة
يوم تطلعلي ويوم ماتجيش
من دلوقتي عشاني بعيش

اتعودتي تكوني أميرة
تنهي وتأمري بالتكشيرة
لكن لما تزوري بلادي
لازم تدخلي بالتأشيرة

تتفتشي من فوقك تحتك
مهما تداري باينة فضيحتك
ياه يا فصاحتك ياه يابجاحتك
لعب الكلمة هو مساحتك
لو تعترفي كنت سامحتك

شايفك كلك حافظك كلك
لون تقاطيعك ريحتك ظلك
عارف امتى أقدر أذلك
بس بجد
متعودتش أشـرّد حد

حبك دايما عامل أزمة
عريان ملط ولابس جزمة
خايف ضايع ما بيحميش
عايش تايه ما يـدفـيـش
فاتح ضلفة لـ وِش الدنيا
شنكـِل ليها مليون شيش
أيوة عشانك كنت بعيش
بس الدرس اتـشـرّح جدا
مركب قلبي .... مبتصديش

بصلي الفجر حاضر

2007-09-11T22:23:00.001+02:00

بصلي الفجر حاضر
في جامع مش بعيد
على ناصية تاني عطفة
في شارع بورسعيد

وأتمنى جوة نفسي
يكون اليوم سعيد

لاتسجل في المحاضر
بإني كنت حاضر
في الصف الأولاني
برتبة العميد

بصلي الفجر بس
والجمعة لو صحيت
ولا مرة سمعت خطبة
عشان بعيش عبيط

وإن مرة سمعت غلطة
حلاوة ده الأدان
أخاف أخطف لي ركعة
في زاوية الميدان
ليكون الواد أسامة
مأمم المكان
وأتسجل في الدفاتر
زيادة ع الإخوان

بـغـيـّر في الجوامع
وأخش خفيف خفيف
لا أتعلق من بطاطي
ولا أي مكان ظريف

عايزيني عبيط وخفة
بغرق شعري جل
وأهيص مع أي مزة
وأتصور تبقى ذل
فأنفذ الأوامر
وأمشي براس مطاطي
وإن مرة طلعلي حس
يهددوني بإخواتي

طول عمري واد مناكف
وصوتي من دماغي
حسيس في كل حتة
آخرتها جابوا داغي

بحب عمرو خالد
وأعشق اليسار
وسماعي للشعراوي
حببني في الأنصار
ما انا في الأصل مصري
لا حزب ولا تيار

في حلو في كل واحد
ملوش مثيل في التاني
رسالة نظيفة خالص
صادقة ليها معاني

يا حزب وطني اصحى
ياحزب وطني فوق
الفكرة في التكافـل
مش لعبة الخازوق

يا حزب وطني افهم
الصح ليه وشوش
متسيب الكل يلعب
وفي الخناقة حوش

وسـقـّـف في الموالد
وقـولها دول ولادي
الكــل في العـباية
بفكر مش أحادي

ونصلي الفجر حاضر
في الجامع الكبير
الكل صف واحد
أمير جنب الغفير
................................

آسف لكسرة النفس دي في رمضان

بس مش بإيدي رمضان مرتبط عندي بحاجات

مش هعرف اعملها السنة دي

مش عشان الامتحانات طبعا

علشان اييييييييييييييييييه

أرجو إضافة المقطع الصوتي ده للمشاركة الوجدانية

أنا مش ضعيف

2007-09-06T03:47:00.000+02:00

أنا مش ضعيف
ولا كنت يوم شحات ثقة
أحلامي لسه موجوجة
وإن جالي يوم شفت البكا
أصبح حزين ع اللي اشتكى
واللي واخدها أنتكة
لجل مايبدأ بالسلام
ده مكنش عيب ولا كان حرام
إني أشوفني في المنام
عيل جدع
أنا مش ضعيف
ولا كنت يوم شحات ثقة
أيامي لسه مدركة
ان الحياة متشبكة
ولازمها ناس سوبر بشر
بقلب قاسي م الحجر
وأنا مش ملاك
يمكن بشر
أنا صنف حالم م الغجر

................................................

رمضان كريم عليكم جميعا

وادعولنا الامتحانات آخر رمضان

بـــوحـــة .. سـكـتـم بـكـتـم

2007-08-18T04:29:00.001+02:00

هسكت ساكت سكتم بكتم
أيوة لساني تحت سناني
هخرس وأقطم
أصل الحق ياناس لم يعجب
طالع نازل يخبط يقلب
وأمي قالتلي
ابني حبيبي
خاف م التعلب
ونا من مزنق كوني الأرنب
هسكت ساكت أو راح أكدب

بس الأزمة
ان الكدب رابطني في حزمة
لما أتمطع وأبدأ أنخع
فتلة صوتي مني بتقطع
أرجع أكتر وأفشر وأفشر
وسط لساني حبـّاية بتطلع
أفشر أكتر تفضل تكبر
لـمّـن سدت حلقي الغالي

والداهية الأكبر
طرف لساني نـَاحـَـل في سناني
لما الصدق غصبن عني
لوحده بيطلع
كات بتصُـده ويرجع تاني
وأبـلـع وأسكـت
وأفضـل أزمِـت
خااااايـف أفـلـِت
حـبـِة حـق تقوم فضحاني
غصبن عني طـِلعت مني
عايز حقي
ألقى ماسورة
ساكنة فـ بـُقي
إيه يااااخوانا
نداء بصوت الكفار

اقـفـل بُـقـك .... لـِـمْ لسانك
عَـلـّـق كـفـّـك ..... سَـقـْف ودانك
قول الآااااااااه
آهين آهين آهين آه
والخلق لا حولة يردوا وراه
آاااه آاااه آااه آاااه بصوت الحمار

أصل العـَــوْ ياناس في الأ وّ ل
كان ضكــطـور أسنان واتحـوّ ل
مش من خوفي
لأ لأ لأ ه رايح أتـبـوّ ل
هما يادوبك كام كام حرف
منهم يــِحْيـِي
أما التاني ممنوع م الصرف

هسكت ساكت خالص مالص
دافن راسي ف قلب الغاطس
أصل الجذر طالع بالناقص
عايز توصل ..لازم تفصل
قالوا بتخسر
دينك أهلك روحك ناسك
عيش ممسوخ
ملعوب في أساسك
بصوت البرامج التعليمية

عـلـّــل وافـطــِـــن
ساكن مالطا ... ساكن أصلا
ولا ..... اتأجر منه المسكن
ولا .....عيشته اينديد تاسكا
لو كان وشه مركب مَاسْـكا
لافِـف عُمره ... فـ طارة تاكسا

صبــّـح صبـــّــح
أصل الجرح في قلبي بينقح
كل ما أخطي خطوة زيادة
ألقى الظلم ده أصبح عادة
ناس بتدوق العيشة السُكـّر
واحنا اتكتبت لينا السادة

ســادة بســـــــادة
ليه راح أرفض أكون سجادة
أيـون هسكت فــُـل الـفــل
شارب شوربة بِــِـذر الـذل
واخـِد خِـتم الـبـاشـا دهـُـل

طــازة بطــازة
هـسجـن حلمي جـوة إزازة
شايـف الدنيا م الـبـزازة
راضـع عـتـمة بـكل لـذاذة
أيون هسكت

صابر ..راضي ..شاكر.. قانع
بايس إيدي
شعر ودقن
بوحة المصري
لمبي وعصري
عوكل نازل لت وعجن
كركر جدن .....كركر خالص
أيــــــوة ..أيـــــوة
حاضر ..حاضر ..حاضر

بـــطــو طــــــــة

2007-08-10T04:56:00.000+02:00

بطوطة النوتة ..كـونـوتة حلوة .... بنوتة صغـنطوطة

تروحي وترجعيلنا بألف سلامة

وحاولي تحجي في أي حتة في السعودية

أي جبل لفي حواليه وأدعيلنا هناك

ومتكسليش وتقولي هلف تلات أشواط ونص على قدي

عارفينك دوس ياباشا ربنا معاك ويكرمك

دي لمة الناس حواليك في الصالح ملهاش تمن

واللي بيحبه ربه عاش في قلوب الناس سكن

وانت كده فعلا يارب نكون ادينالك حقك ويعجبك الكلام

حاولنا نجيبه على لسانك.. بصوتك.. تشكر قوي

كان نفسي أعـيـّط من زمان

لكن نسـيـت

شوكرون كتير ... ع الله خير

بطوط ياناس ... علطول كبير

ياما نفسي أعلم في الولاد

وأجيب لي بت تكون سعاد

نفرح ونعمل عيد ميلاد

وأرقص وبيها الشمع قاد

تصبح عروسة الواد أنـس

وأرجـع وأحـس بالونس

وأحضن دموع صوت النفس

لما نخــاف م الامتحان

دخلة نتيجة ع البيبان

بطوط نجح .... والأهلي فـاز

وتريكة داس .... يا عزولــنا عـُض في الإزاز

محلى ترعـيـشة الحواجـب

لمــا بنكـدب ع الأهالي

لجـل نـقابـل بعـضــنا

والتلفونات ... والتربيطات

مـحـْلاهــا أحـلام الـبنات

ويــّا خروجات المصايف

وسـط زحمـة المـــواقف

دمعة عيون والكل خايف

لحظـة تـنادي بالـفراق

توحشني لـمـّة الاشتياق

لما ننا قِــر بعضنا

على أكلة حلوة حنينة

واللب الأبيض ... بعد تسبيكة الغدا

ويا الدوريتوس والسبرايت

حتى فــ غـســيل المواعـين

كان ضحكة حلوة في العينين

وسباق طويل مليان إيدين

حاضنة بلوجات الهــوى

حتى تلخيــص المـلازم

برميل عسل على قلبنا

فـرْدِة جنـاحـنا لبعضــنا

مركـب ورق بتـضمــنا

راكـبها محروم م الـغـرق

طريقها نوصــل شـطـــنا

في غـُناها عايـزة تقولـنا

تيجي نفرح ..تيجي نـخرج

تيجي نضحك ع اللي فـات

تيجي نرقـص أو نغــني

أجــمـل ضـفاير ذكريـات

بحب أمشي حافي

2007-08-10T02:31:00.002+02:00

بحب أمشي حافي ..وأرقــّص كـتافي

وطول عمري ُمتعب ..بدندن ولا أتعب

بعيش كالغوازي ..أرقــّص وأباصي

في دنيا الهجايص ..مفـصـّـل مقاسي

نهاري مِصـَلـّي بكــبـّر وأعلي

وليلي تملي شيطاني زاغرلي

يقولي يشاورلي

متيجي ياخلي .....تعالى نخلي

ساعتنا تجلي

حلاوة تلاقيني ...مشبك ايديني

هريسة في دنيا ...بتـنحـِل في ديني

وأروح له وأدلـل ...يا شوشو ياسيدي

ياشوشو ياسيدي

يآخدني في جنب... ويمسك وداني

كما لو كأنه... أخويا وعشاني

ويبدأ يستـِف حروف الكلام

ويعزف لوحده دواهي الَـعـَلام

ويغزل ضفاير معاهدة سلاااااام

تصور لعـقـلي تمام النظام

حوار بصوت الشيطان

حبيبي يا رقة بلاها طنط لأه

فولية حياتك وسمسم آهاتك

جوزية جنايهة تبسبس شتاتك

وترضِي الحبيب

بدخـْـلِة صواني قطايف العصاري

ماليها الزبيب

ضميرك كُـنافة فـ قصر تلاقيك

وفـُكـّـك ياسيدي هتـلهط شوريك

وفجأة تناديني حبوب الصراحة

وأثور جوة مني ..وتعلى البجاحة

أطش بخيبتي ....في جردل قباحة

ملآن مـَيــّة ديرتي ..وماليش في السباحة

غريق غصب عني ...وروحي بتآكلني

إيه اللي جابرني

أخاوي الزبالة ..وأدوب في العفن

على رغم إني ..ماليش غير كفن

فقير الأماني جعان الطموح

بَضَـحّـك وأغني وأنا بتِـلـْت روح

خـنـقـني حـفــَايا وخايف أبوح

تخوني الخطاوي وســـِف الجروح

بَحَجـِّـل وأتـــوه مابـــين آه وأوه

وبلعـــن أبـــــوك ياداء السـكات

يما نفسي أشوفلك دقـيقة حــداد

وأعود وأمشي حافي وأنط الحبال

لكين جرح قلبي صعيب الاحتمال

براقع وخافية وراها الوشوش

لــُغــَاهم معايا وخايف أبوش

وخايف أبووووووووش

شيكو أون لاين .. في ذمة الله

2007-08-04T09:19:00.000+02:00

هو شعور غريب بجد الواحد زي مابيقرا حاجات بتسعده

ويبقى نفسه يعرف شكل صاحبها وبيرتبط بيه نفسيا

لدرجة انه لو قالوله ده اللي واقف قدامك

هو اللي كاتب الكلام ده ممكن تآخده بالحضن سواء ولد أوبنت

وبعدين تبدأ تفكر بعدها بثواني ده ميعرفنيش إيه اللي أنا عملته

المهم شيكو أون لاين توفيت ليلة النصف من رجب

ويمكن كنت شفت اللينك بتاعها عند

أشرف توفيق وكنت بقرالها قبل ما أعمل بلوجتي

وكانت بتعلق عندي وعند عاشق الروح

اللي قال الخبر أخوها على الشات بوكس بتاعها

كل اللي يدخل عندي أرجوكم أرجوكم يقرالها الفاتحة

ويدعيلها ربنا يثبتها

ولو هتخش عندها أرجوك أقفل الصوت

لأن محدش عارف الباسورد بتاعها علشان يقفل المزيكاااااااااااا

وأحب أهديلكم جزء من ديوان نضارة نظر للشاعر محمود رضوان

شيكو كانت منزلاه بوست عندها خاصة لأختي الغالية بطوطة

بننجرح كل يوم لكن بيفرحنا

ان انت جوه القلب ساكن فى افراحنا

وانت الامل فى العيون

والنشوة ساعة الجنون

واياك تكون زيهم وتروح وتجرحنا

ده انت الوحيد منهم تقدر تريحنا

بننجرح

طب ليه بنجرح بعض

وليه يكون الشوك هو الدليل على الورد

وليه يضيع عمرنا بين الجراح والويل

واحنا اللى كان حلمنا الفجر بعد الليل

وليه يطول صبرنا من غير أمل ودليل

واحنا اللى من حقنا ان الامانى تميل

تــاج .. سـتـين نـيـلـة

2007-08-01T03:12:00.000+02:00

إخواتي الأعزاء شكرا

هوندا هانم ربنا يخليكي على التاج

ومبروك النجاح وعقبال ماتبطلي رغي بقى

أما جميلة أبو حريد ست الصوحفية منى الشاذلي المستقبل

لأ مفيش زي منى الشاذلي انتي منى الحسيني اللي بتآكل الضيوف دي

باين بتحبي أوبرا ....إلاهي أشوفك دار الأوبرا كلها

وعقبال النجاح انتي كمان ده بالنوسبة للتاج

أما الستين نيلة دي

على دماغ كل اللي شافه ولا صلى ع النبي

الحلو أبو عرق في قورته الطعم النايتي عاشق الروح

وده طبعا لا ينكر إن في ستومية نيلة على دماغه هو شخصيا

لأنه ساب القهوة واشتغل الساااافل

نزل سوق العمل لا تحسسسد

حاولت أجرب ياسكايار معاه كل الأساليب مفيش فايدة

نقط مية ع العتبة ..ملح ورشيت ..شراباته المعفنة كلها عندي

أنا بقيت درجة تانية ياسكايار..مش عارف أتف

كان لازم نكمل حلم البطيخة والجرنان والكرش

والمية وخمسين جنيه

وقشر البطيخ المرمي في كل حتة لكن عملها البطل

وعبر فوق .....الله يسهله ويديمها عليه

صوووووت غل فظييع مع جززززز جامد ع السنان

بجد ربنا يوفقك يا عاشق وتبقى حاجة نظيفة

انت متستاهلش أي خير علطول كنت بحاسبله في كل حتة

وياريت تحاول تنسى الجبنة الرومي واللانشون بقى كفاية

نفسي أشوفك متعاص شحم متدرمغ في الدنيا

وتنسى كلمة ميرسي وتبطل تتكلم إنجليزي

البوست ده شكله طويل بس معلش الحالة اشتغلت بقى

سؤال حلزوني لولبي خزعبلي؟

ليه مبنعرفش نقول مع السلامة بدون جرح وألم برضا نفس

يعني مهمتي هنا خلصت وجاري البحث ربنا عايز كده

كل أما أبدأ حاجة أو علاقة حتى مع الأنتيمون والأنتيمات

أكيد الدنيا هتفرق بحكم الزمن أحط ده في دمااغي كله فاني

يبقى أعيش كل لحظة من أولها بمتعة شديدة

لأني حاطط في حسابي إنها ماشية فأستمتع جامد

وساعة أما تيجي مع السلامة

أبقى متعوووودة داااااااااااااااااااااااايمن

فيبقى رد الفعل عقلاني وميتركش أثر سلبي محطم

لأن المشهد الأخراني هو اللي هيتسيف وخصوصا لو كان دراما

على مزيكا ياسر عبد الرحمن أين قلبي ولا مواطن مصري

يعني ميتم واتقتل فيه تلاتة

واللي واقفين في الخاطر انتحروا وعربية الاسعاف

اللي شايلة المصابين خبطت عربية مطافي

وقعوا في البحر كلهم ولحسن الحظ كان في بقعة زيت ع الميه

ولعت بيهم وفيهم وليهم وملقوش حد يطفيها

ليه بس كده بالراحة ردوا عليا في ده بالذات لأنه يهمني

ودي مش دعوة لتبلد المشاعير زي التهمة الموجهة ليا داايمن

واصحابها عارفين نفسهم البوكس جاي جاي هتتلموا ولااااا

مستعينا بالله وبثقتي في رجال الضفادع البشرية أبدأ التاج

انت مين؟

اسمحولي هرد بطريقة حلاوة

أنا القلب الرث في ملمح التهتك

أنا من عاش في دنيا تهوى التفكك

أنا نجم العلا يهوي صريعا دون تلكؤ

أنا وجه البسمة الخالدة ..أنا قلب الفرحة النابضة

أنا ارض الأحلام الشاردة ..أنا زمن الأوهام المتمردة

أنا ابن لحظات الحنق الباردة

أكتر ست شخصيات بتحبهم؟

هحتفظ بيه لنفسي السؤال ده مش عايز أجاوب ديموقراطي

هما عارفين نفسهم ربنا يخليهم ليا

انت سعيد؟

يانهار اسود ياجدعان ايه السؤال ده مخدنهوش

حوش يارب حوش

أنا أسعد مخلوق ان لسه عندي مخ بفكر بيه بعد كل اللي احنا فيه

هو متعب بس لو مشتغلش أموت يكفيني النعمة دي

اللي تخليني سعيد مسعود أبو السعد السعداوي السعدني

لو اجتمعت انت والريس تقوله إيه؟

كلمة واحدة بس هرد بيها على كل اللي فات

انت مش ابني تثثثث

هقوله ياباشا احنا نجيب كشكول الأستاذ بتاع عيال تجارة

نهد الدور ونلعب م الأول نكتب فيه صادر ووارد مكسب وخسارة

قناة سويس وبترول وتوشكى وكل الكلام

ونجيب الكوتش نحطه في قلب حوض مية نشوف الخرم فين؟

أيون التسريب منين فثثثثثثث دي من أنهي حتة

وبعد كده نقسم على أربعة انت الأول طبعا وأحمد عز وأنا

علشان أعمل حلاوة للكابلات الطاقة والأمان يتواصلان

حديد حلاوة الدخيلة لو مكنتش انت تسلحني مين هيسلحني

أسياخنا طولها كام صح صح صح

لو معاك مليون ونص هتعمل إيه؟

هبني دار أيتام وأعمل اجتماع مجلس آباء

لأ بجد حلمي أعمل حاجة زي مجمع رابعة العدوية في بلدي قبل ما أموت

أيتام ومستوصف وأشعة ودار مناسبات ومسجد

بقاله معايا تلات سنين ودار رعاية للفئات الخاصة

يمكن دول أكتر حاجة هزتني في الفترة الأخيرة

بتحب مصر؟

فاكر فاكر لما كان وكان وكان لينا في كل مكان مكان

ميصحش أدعي عليها وأقول جتها شوطة

الذنب مش ذنبها دي الحدوتة مغلوطة

حفظناها وعرفناها وبنعيش جواها

بتحب البنات؟

دي أحلى حاجة طلعت بيها م الدنيا في كل حتة ليا اخوات

انتظام ولا انتساب ولا تلاكيك حتى

عيلة ..شغل ..زمايل.. مشغل.. مخزن ..مصرف

بس إخواتي بجد أحلى حاجة في حياتي

إيه أكتر موقف محرج اتعرضت ليه؟

صراحة مش فاكر وشايفها نعمة

ميهمنيش رأي حد بيقلل مني أو بيتريق عليا ويحرجني

وأفتكر إني بغلاستي المعهودة بحرج الموقف نفسه

وبحط ناس كتير في مواقف محرجة بس بقصد دايمن

انهم يواجهوا ويتحطوا في الفعل اللي بيهربوا منه

وقد تكون دي رسالتك في الدنيا اللي تخلي حياتك ليها قيمة

إيه أكتر أمنية نفسك ربنا يحققهالك؟

غير النجاح في الدنيا والفلووووووووس

أموت في صلاة فجر ليلة جمعة

ويتصلى عليا الجمعة في رابعة العدوية

مش عايز أقول الكعبة علشان ده كده طمع.. مستاهلوش

تمرر التاج لمين؟

بلاش أمرر حاجة هي مرار لوحدها وأنا حلاوة ههه

أحب افنش بالبقين دول لأستاذي الشاعر علي سلامة

تيجي نحسبها نلاقيها احنا فيها

القديم زي الجديد نفس الملامح والحكاية

لف واتفرج معايا ..ع اللي نايم ..واللي صاحي

واللي طافي النور وصاحي.. واللي بتسليه جراحي

ع العصير والفطير ..واللي طاير بس مكسور الضمير

واللي قال فات الكتير ...ع اللي المشغول بالدولار

واللي ضيع نص عمره في كام بهيمة وكام حمار

واللي قال الأرض باقية واللي تور مربوط في ساقية

واللي لسه قميصه ناقص فيه زرار

وفــثواني ........مات كيلاني

كل واحد فينا قام يحسبها تاني

اللي نايم واللي صاحي واللي بيفكر ينام كله قام

قد إيه في العمر باقي يسوى كام

أما شاعر بس بايخ ..جاي ليه تشعللها نار

يلا نهرب من قساوة الجد ..ونبيع في الهزار

في العصير والفطير واللي لسه قميصه ناقص فيه زرار

الـحـــب حـريـــــة

2007-07-16T19:38:00.000+02:00

جاي من بلادي البعيدة
لا زاد ولا مية
وغربتي صاحبتي
بتحوم حواليا
وانتي تقوليلي بحبك
بتحبي إيه فيا؟
ودا حب إيه ده
اللي مفيهش حرية

حبيت أبتدي بالكلمتين دول للأبنودي

عدد واحد مواطن مصري لوز اللوز مادد بوز داخل بيتهم

تبدأ تتلفت حواليه نظرات التساؤل المصرية الحشرية

مالك ياكوكو؟ يرد ماليش

وتبدأ تطفح المجاري في نفسيات المحيطين بيه

هو ماله ده ياخويا ده صغنن آه والله

أنا قلتله بلاش محشي قبل النوم

بلاش مسقعة ليلة الامتحان يا ام السيد

وينقسم الناس إلى فريقين

فريق مباشر عايز يعرف بطريقة زن النحل المملة

مالك ايه حصل ؟حد زعلك ؟الموبايل ضاع البت اتخطبت؟

أمك عيانة صاحبك اتسمم وييييييييييييك

وفريق الناس الحلزوني الدائري أجارك الله

يحدف كلمة ويستنى ويحووووووووم

زي الناموسة الرزلة اللي بتخش تحت الكوفيرتة

ظهر يوم في الصيف والنور قاطع مفيش مراوح

الجميل ماله؟ الموزة قلبته ويضحك هوة

وللأسف الاتنين ولا حول ولا قوة إلا بالله

غرضهم نبيييييييل وفؤاد واعتماد وتضامن

وراضية وشادية وفادية وكل دول

بس وبعدين

البني آدم في اللحظة دي بيبقى في حالة متقلبة

ممكن يسكت ممكن يهب زي وابور الجاز وممكن يتكلم

وممكن برضه يخاف يتكلم وده الأغلب الأعم

لأنه زي اعتراف تحت ضغط

فهيحس بالقهر أو يحس بضعف لأنه اتكلم وهو مش عايز

أو اتكلم لشخص غير مناسب

وده لا سمح الله مش سوداوية

لكن حرص ولا تخون مش جايز الدنيا تدور ويتعرى المستور

طيب نوصل للحلول الوسط اللي قلما نوصلها

ونسأل سؤال لطيف

هو الباشا مهموم ولا مغموم

أيون ضارب هم ولا قالبة غم سؤال لوزعي؟

مغموم يعني عنده غم على قلب اللي خلفوه وحزن أسود

يبقى حقه يعيش اللحظة دي

ولو طلب مني حاجة عينيا ليه مش أكتر

أو مهموم يعني شايل هم حاجة ومهتم بيها ده من عبد المجيد الصحاح

مهتم يعني شخص عنده مسئولية وبيفكر فيها

والاتنين من حقهم كامل الخصوصية

ميتكلمش غير لو عايز

على قد علمي ممكن في حالة زي دي

تعمل إيه ياواد ياحلاوة حرية

تطري القعدة وتقلب الطربيزة

ميهمنيش أعرف مالك لأنك لو عايز تقول هتقول

لكن يهمني انك تمشي من معايا سعيد لأني بحبك

وأمرك يهمني حتى لو محصلتش النقلة دي

تسيب كلام عارف إنه هيفكر فيه لما يمشي

يخليه ييخرج م الحالة دي لو يهمك

وده بقى كليب الحصان اللي فات

صوته ممكن يتبح ويروح بس لو ريح يومين هيرجع

مش غرور لأنه عارف نفسه حصان م الأصيل

هيوصل لما يسعى ويفحت في الصخر ويفكر

بس بطريقته اللي تمشي معاه ومتجرحش حد

محدش عارف فين منين ؟

ممكن فينك ميمشيش مع فيني

في حصان طاقته خمسين وحضان طاقته مية

والطاقة لا تفنى ولا تستحدث

حصان ممكن يدي نص آخره ويهنج

وحصان شغال بكرة وبعده وعلطول

حتى لو هبط هيتجدد تاني

ولأننا للأسف في مجتمع مسطبي

الكل واقف يتفرج ومستنيلك غلطة حتى لو كنت بتهرج

فممكن ينتصر قدام الناس ويتهزم قصاد نفسه

بينما العكس لو الناس كلها حلفت إنه حمار أو بغل

وهو عارف نفسه حصان فهو أكيد المنتصر الوحيييد

المثال الأخير مقتبس من الشيخ علي جمعة

قريت جملة لطيفة للمعلم روزفلت

كن في كل مكان كما لو أنه آخر مكان

وابذل قصارى جهدك لبناء هذا المكان

ولأننا ديمن بندور على نفسنا

فلازم يبقى معانا موازين

نفكر بيها ونقول ده يمشي علينا وده لأ

بق كمان الشاعر العبقري علي سلامة نقفل بيه

كل ما أوزن ألاقي لسه ناقصني حتة

أحط حتة ....تقل حتة

أجيب قميص تضيع جاكتة

وأعيش لي ساعة تفوتني ستة

وكل ما أوزن ألاقي ناقص

أقول بناقص لو هي حتة

أتاري لسه... ولسه تآخد سنين وحتة

وحاجات تسيبني وحاجات تآخدني

لحاجات تخبط في كل حتة

وأقول هنفرح في يوم حنفرح

ويوم مانفرح على الله

يفضل في القلب حتة

على الله يفضل في القلب حتة

شـفـــرة هـــلامـيـة

2007-07-14T15:19:00.000+02:00

اعتاد على استقبال الشفرات في كل مكان يذهب إليه

ويترجمها بطريقته الخاصة التي كانت ربما تصيب في معظم الأحيان

ولكن استوقفته تلك النظرة

تلك الشفرة الهلامية .....المجهولة الترجمة

التي لم ترحل بعد

وظلت كحجر صغير ألقي في بحيرة خياله لاتنتهي دواماتها

ولا يريدها هو أن تنتهي

فقد لزم ذاك الجواد الأسمر الأصيل صحراء الحياة البرية

يجول فيها بكل قوة ثقة منه بأنه يستطيع

يستطيع أن يصل طرفي الأرض بقدميه

حتى لو مات دون حلمه

لكن لازال يواصل

بينما يلوح له من بعيد سراب واحة

بعد أن بدأ صهيله في الحشرجة من شدة التعب

لم يعد قادرا على طلب النجدة

التي قلما يطلبها ولكنه الهلاك ..النزع الأخير

مالذي يدعوه للمكابرة ؟

لم يعتد أن يذل رأسه ليشرب

لم يعتد الامتطاء

لم يعتد انحناء الظهر حتى لو بالحب

أصابه العطب في ظل كل تلك الشفرات

تمنى أن يصاب بالصمم لينسى كل تلك الأصوات

أو العمى لربما يهرب من مواجهة تلك النظرة الموجعة في نفسه

فالهروب بدون بصيرة مسكن مؤقت ولكنه مريح

قبل الهاوية عند حافة الجبل

فالألم آت آت ولكن لمرة واحدة ونهائية

أما المواجهة كثيرة الجراح والطعنات

على عكس كل مبادئ الإباء التي اعتنقها

بعيدا عن حياة الذكور العقيمة

التي تهوى العبث ولـَعْــق مخلفات السابقين

اختار أن يكون في نظر الناس مهزوما

ولكن في رده على تلك الشفرة ظل المنتصر الأوحد

الحب في زمن الكـلوووور

2007-06-17T00:55:00.000+02:00

صاحي الصبح نايم بتاع خماشر ساعة ولا حاجة

مزاجي لوز اللووز والطقس أمام عيوني لوزعي خزعبلي

إذ بي أسمع صوت الست ليلى مراد في شحات الغرام

بعدها مقدمة مسلسل أرابيسك وأفتكر العسل حسن أرابيسك

ومناوشاته الدائمة مع توحيدة بنت الجيران لأستيقظ على واقع مرير

أنا معنديش بنت جيران

هَـوَدي البلكونة الطويلة دي فين

أنا فيا ايه وحش

طول ... وطويل جدااانن

عضلات ... حدث ولا حرج

رٌفع ورفيع ... شَعر وبيقع

لسان وعايز القطع ... نظر وضايع

ليه ياربي تعمل فيا كده

نص نساء العالمين اخواتي

وربع بيشاور عقله والربع الباقي أكيد راضعين عليا

ولأن في محض روح على رأي دينا هانم

الروح دي بقى وهي راكبة الموت سيكل ورايحة الشغل

عملت حادثة في أحاسيسها

فرقعت فيها أنبوبة بوتاجاز

إلى أن ماتت مشنوقة محروقة مخنوقة

وهيا طالعة السما خبطتها طيارة

نزلت ع الأرض تاني دهسها قطر

وهي مهروسة كده متفشفشة على قضبان القطر

عدت عليها عربية كارو شايلة مخلفات حيوانية كريهة الرائحة

يقوم ايه يتوقف الحمار على الروح الميتة ليقضي حاجته

ووسط كل اللوووومانسية الحالمة دي لقيت الحل

حأ حأ حأ ...... أنا جــــــدع

شباكي كل يوم ... مفتوح ملـٌهش نوم

مستني م الهدوم .... تطـل بنضارتها

وتوقع المشابك .... وكسوفها عليها سابك

وتشب بطراطيفها .... وترفع الحواجب

تـِنده يطلعلي ضي ... وأقول في الدنيا حي

عمري ماشفت زي ... جمالها في البشر

وأعملها حجة وأنزل خطوة بألف ميل

أشجع تاني نفسي ده معدش مستحيل

يسبقني الواد أخوها وأقف محتار عويل

ياريتني كنت مشبك متعلق في الشفايف

ياريتني كنت هِدمة من ضمن ده الغسيل

وأقع من تاني وأرجع للحبل بقيت أسير

قلبي ألوانه راحت من حٌـرقة الكلور

زهرة أيامي باشت من وقفة الطابور

بوشوش بيكي نفسي في غَــلِيّة العذاب

متكرمش جوة حلم متكمكم في الدولاب

ياست الدنيا حنـّي ده معدش شئ فاكرني

كل اللي باقي مني حبة احساس حاضني

يطرطشني برذاذه وفـ ثانية يروح عاصرني

تـــاجي و أنـا حر فــيه

2007-06-16T23:49:00.000+02:00

الاهي يسترك ويديكي على قد نيتك يا هوندا هانم

انك اخترتيني بالتاج ده رغم اني مقتنع انه ملوش فايدة قوي

وبالذات مع العالم اللي واقفة تتفرج ع الدنيا أمثالنا

كناسة الحواري وهباب الفرن وعواجيز الفرح

بس بدل حالة الركود في البلوجات آهو يبقى تغيير جو

وطالما جه منك ربنا يخليكي وعلى عيني

ويارب يبقى عدل ومفيد لأي حد أو باي حاجة

أحب شخص لقلبك في الدنيا؟

أكيد أبويا اللي ليه فضل كبير عليا

علمني آدي ولا أنتظرش الرد واني مهما حصل بزيد وأتعلم

ولا أخسر أو أتهد مهما اديت

أو اتآخد مني مبشيلش ف قلبي ضغينة لحد

والوحيد اللي مقتنع ان مكاني الحزب الوطني مش عارف ليه

يمكن علشان بيخاف عليا

انسان مستعد تضحي بحياتك – ركز فى كلمة حياتك – عشانه؟

أمي برغم خزعبلاتها الدائمة ومناوشاتنا المستديمة بس

شربات على قلبي وزي العسل

انسان كرهته لدرجة الجنون و تمنيت لو تمسك سكينة وتنقض عليه

وتغرزها فى قلبه تقتله وتقف تبص لجثته وتشفي غليل قلبك؟

أي حد في أمن الدولة

وكان في دكتور لطيف عندي في الكلية كان قطع تظلم ليا في النتيجة

لما طلعت نتيجته اني ناجح صمم ان ده غلط في الاجراءات

وقطع ورقة التظلم وكنت راجع م المصيف قبل امتحان الدور التاني بأسبوع

على اني ناجح خلاص ودخلت الامتحان بس الحمد لله نجحت

ما هو اسم اجمل كتاب كتبه بشر قراته ومحتفظ به حتي الان؟

بحب قراية الشعر جدا ... ليلى والمجنون صلاح عبد الصبور

رباعيات صلاح جاهين

اسم كتاب كتبه بشر برضة- انت متعلق بيه بتقراه كل فترة؟

جوابات حراجي القط ...... الأبنودي

مرسال لحبيبتي ... أشرف توفيق

اهم جهاز منزلى انت متعلق بيه او بتستخدمه كتير؟

البراد الكهربا بتاع الشاي اللي أبويا جايبه م الخليج

على أساس ان احنا أغنيا

مكان تحس بالراحة عندما تدخله؟

سطح بيتنا مع كوباية شاي وأقعد على السور مدلدل رجليا في الشارع

بعد الساعة اتنين بالليل مع الست فيروز... والحمــّام بالطبع ده المكان التاني

شىء تحس بالراحة النفسية عندما تنظر اليه؟

صينية كوسة باشاميل أو بط غطسان في رز مفلفل

ياروحي عليهم قطااااااااقيط

أو باب الحمام وأنا قاعد ع اللللللللللللللللللـــ

مكان تحس فيه بالحنين الى شىء لا تدرى ماهو

و ذكريات جارفة الى لاشىء؟

بنك اسكندرية خاصة عند الخزنة

اجمل مدينة زرتها داخل مصر ؟

حبيبتي الغالية ...... أسوان

أجمل مكان طبيعي رأيته داخل مصر ؟

لأني مبحبش الصمت

ربنا رزقني بالدهايمة

طبعا بلا منازع مصر كلها بتعدي فيها في يوم واحد

الدهايمة أي الحي بتاعي

مجاري تلاقي كاوتشات محروقة تلاقي

عيال صغيرة ماشية بكل حرية في الشارع بيعبروا عن رأيهم

معيز بالهبل خرفان وجاموس علشان الونس

وكمان الفراخ لو حبيت تصحى بدري

و4 لتر بجنيه ياكلووور وشيل يا بطيخ

وأي حاجة قديمة للبيع وكله ع العربية بجنيه

بتاع الخزين ياتوووووم

جو خزعبلي بجد

شخصية كارتونية بتحبها ؟

جيري .....عيل لبط ومجرم

نوع هاتفك المحمول؟

والله سيادتك أنا لاجئ على موبايل أختي 6630بعد مابعت

موبايلي من أجل المال

سرعة بروسيسور جهازك؟

لا تحسد २.4

حجم ذاكرة –هارد- جهازك؟

اتحرق هارد 120 وحسبي الله ونعم الوكيل

لكن عندنا دلوقتي 160

المساحة التى تشغلها المواد الاسلامية على جهازك؟

المهم الفايدة مش المساحة لا مؤاخذة

أهم هدف انت واضعه لحياتك الآن؟

نجيب ساويرس

الترشيح للرئاسة قصاد جيمي في دورته التالتة

علشان سني لسه صغير

مواصفات فتى الأحلام بالنسبة لك؟

يكون سنانه معوجة زي سكايار وقورته كبيرة زي عاشق

وعنده ثه زي مستكنيص وطيب زي مؤمن ودمه خفيف زي علي

يا أمي أبوس ايدك ركزي أنا ذكـــــر في البطاقة

اللي هو دايرة وسهم في الأحياء

بجد فتاة أحلامي ....... مش عايز

انما لو بهزر أرملة في التلاتين كانت زوجة لواء أو وزير سابق

ويا سلام لو في الحزب الوطني كمان

صف ما يأتى

شعورك لما بتسمع كلمة مصر ؟

ياااااااااااه برفع راسي لفوق خمسة وأربعين درجة وبفتح عيني نص فتحة

ويطلع في قورتي مية وحداشر وبمد رجلي خطوة لقدام

وايديا متشبكين ورا ضهري

والخطوة التانية بقع في بلاعة مفتوحة في الدهايمة

أفوق وأطلع وأفتح عينيا وأنظف هدومي

يعدي واحد راكب عجلة يضربني على قفايا أقع تاني

على خلفية كلمات أرابيسك

الشر شرق وغرب داخل في حوشنا

حوشوا لا ريح شاردة تقشِقش عشوشنا

حوشوا شرارة تطيش تشـقــّق عروشنا

وتغشنا المرايات تشوش وشوشنا

وتهــِـيل تراب ع الهالة والهـيلمانة

الغش طرطش رش ع الوش بويا

مادريتش مين بلياتشو أو مين رزين

شاب الزمان وشقيت والشكل أبويا

شاخت وشوشنا تهنا بين شين وزين

ولسه ياما هنشوف كمان

شعورك لما بتسمع كلام عن اليهود؟

أشوفك فيك يوم بس

بيعجبني ذكاؤهم وكهنهم لحد مايعملوا اللي عايزينوه

شعورك لما بتشوف ظابط شرطة؟

بحط ايدي على مكان ما وأتذكرعماد الكبير

شعورك لما بتشوف الكناس العجوز فى الطريق؟

بفتكر أسرة كنت رحتلها في رمضان كان الراجل كناس

ومعدش بيعرف ينزل شغله لما نظارته اتكسرت

افكارك تجاه شاب ماشى فى الطريق يلبس جلابية بيضاء قصيرة وعمامة

وله لحية وبجيبه السواك وبيده المصحف؟

ربنا معاك ياعم الحاج بس احنا في زمن الوحوش

احساس يراودك فى اشارة مرور مغلقة بسبب مسئول كبير؟

من حق الكبير يتدلع

اللي يلاقي دلع ومايتدلعش يخش النار

في بق خزعبلي أحب أقفل بيه

اعلم بأن نظرتك الشخصية لذاتك وطموحك

هما اللذان يحددان نجاحك من فشلك!

لذا فاسع أن تصقل نفسك، وأن ترفع من احترامك لذاتك

فهي السبيل لنجاحك، ورافق من يقوي عزيمتك

بحبك في صمتك

2007-06-09T14:29:00.002+02:00

بحبك في صمتك

وبعشق كرامتك

حتى في ملامحك

بساطة شقاوتك

رقـــة كلامك ........... عـِـزة سلامك

خجلك غرامك ........... دايرة مهالك

حروفك ملامحي ......... وطابعة فجوارحي

دي بصمة صوابعي ......... فـي رمشة عينيكي

بخاف يوم ايديا تلامس ايديكي

يكون ربي حرم عينيا تلاقيكي

بقدم ف خطوة وغيرها بشيل

وعارف بإ نك طريق مستحيل

فيا ستي يا للي عيونك تملي

سر احتلالي

أنا بعترفلك بحيرتي وحالي

قصوري قــِوامها ........ رمال الشطوط

فم السهل جدا

لموجة قوية ........... مابينها تفوت

وعمري ماهقبل

لزرعة ندية فأرضي تموت

فيكفيني منك .......... ذكرى الليالي

ويكفيكي مني .......... شرف السكوت

ما انا أصلي عارف حصاني الجموح

ورا اليأس حتما لوحده يروح

يأدي صلاته ويرضى بسباته

كما سطر تايه في دنيا الجروح

يهدي في سعيه ويكتب في نعيه

هنا كان يقطن دمعي اللحوح

الـملــــوخــية

2007-06-08T14:06:00.000+02:00

صباح الصباح واللي جاي أسود م اللي راح

خير اللهم اجعله خير جه في دماغي أوقف الزمن

بتقولوا ايه ياولاد أوقف الزمن

حكمن الواحد داخل على ربع قرن فلفل أخضر محمر

طعمه ماسخ مزروع ع السطح في تربة صناعي

لاشفت مكوناتها قبل ماتتلخبط على بعض

ولا عارف انتاجها هيبقى ايه؟

وكبرت في دماغي وقمت زي الأسد الجسور قومة رجل واحد

وقفت كل ساعات البيت أي نعم شلت كل البطاريات

حتى ساعة الكنيسة بتاعة أمي

اللي بتصحي البيت كله وقفتها

التعليم كله لييه؟

الاصلاح من تحت

ومالايدرك كله لايترك كله

شد الحزام على وسطك

الالتحام والاقتحام والنهضة والقومية والبشاير

ويك ويييييييييييييييك

وغيره وغيره من ثقافة المسطبة المصرية

بس فكرة انك تعديها وتمشي أمورك

خمسة وعشرين سنة أملا في غد مشرق لايجئ

مش لاقيلها غير كلمة ليها علاقة بالأسكندرية

عشمتني بالأمل طرطقت أنا وداني

ولاظبطتلي العمل ولا سبتني في حالي

اللي استفزني للموضوع ده

ولد صغير بشوفه كل يوم ملاك

شايل كتابه بيروح الجامع يقعد تحت العامود

يذاكر بين الصلوات زي اعتكاف

حاجة ترفع لها القبعة

الواد ده لما يكبر هيروح فين؟

أيوة هيروح فين

انت التخين اللي بتآكل ركز معايا

رد رد رد

هيبقى عادي زينا

وهيخش مزرطة الخلاط

انجح وفوت .. وخليك هلفوت

الدكتور قال .. جاوب من ع الشمال

ياغزال ياغزال .. الملزمة بريال

أو حبة جلوكوز أي حشيش يخش بيهم

على صاحب مكتبة لون حبتين

هو نفس الشخص اللي انت بتصور منه

فجأة بلغة العيون ونمل الشفايف وريالة الودان

يكتبله السؤالين دول ياملك بكرة في الامتحان

حلاوتهم هو غاية ولا وسيلة

أعرف ان الوسيلة صلاحيتها بتنتهي

انما دي ملهاش نهاية

أعمار ناس بتتفنى ومحققوش حاجة

واحد زيادة طيب .. انسى

الفكرة مش بنريل على روحنا ولا معقدين وبنعض في الملاية

ولا أي حاجة هي ليه بس مش أكتر

طالما آخرة الزمر طيييييييييييييط

والأراجوزات نازلين تنطيط

يبقى عزيزي المصري العبيط

أبو حياة كلها شخابيط

يؤسفني أقولك

الملوخية مش ناقصة تخريط

في حاجة حلوة منقولة عن الشباب المصري اقروها عجبتني

>>A foreign Newspaper wants to publish a report about the life in
>> Egypt, So they send a female reporter to interview the common
>>citizen in Egypt. when she arrives at cairo..she picks a random
>>guy, and starts her interview
>>
>>
>>Reporter: Hi
>>Egyptian: We 3alkom el salam ya 2otta
>>
>>
>>Reporter: Do u speak english?
>>Egyptian: Berfect
>>
>>
>>
>>Reporter: Do u mind if i interview u?
>>Egyptian: No, I don't have a mind
>>
>>
>>
>>Reporter: What's your name?
>>Egyptian: Taha
>>
>>
>>
>>Reporter: Sex?
>>Taha: I love it
>>
>>
>>
>>Reporter: oh no, i meant male or female?
>>Taha (yelling): what do u sink?
>>
>>
>>
>>Reporter: Its just for the sake of the report..never
>>mind...male....
>>Taha: yas male.. and I can brove it any time u want
>>
>>
>>
>>Reporter: No, thanks, I'll take u for ur word...so..how do u find
>>life here in egypt?
>>Taha: Egybt.. very nice cantry.. nice wezar.. nice food.. byramidz
>>
>>
>>
>>Reporter: oh well.. beside the weather and the pyramids..what else
>>do u like in ur country?
>>Taha: Byramids, nice wezar, nice food
>>
>>
>>
>>Reporter: Ok.. let's move on.. what do u do?
>>Taha: I am very well ,sank u
>>
>>
>>
>>Reporter: No, I mean do u have a job?
>>Taha (looking around him and whispering):Jobat?..no i dont have any
>>(jobat).. lessa mastaba7nash..do u have a (job) with u?..we can
>>esmoke it in my car.. don't warry about bolice
>>
>>
>>
>>Reporter: Oh my god, DO YOU WORK?
>>Taha: Yas yas.. Taxi drivar
>>
>>
>>
>>Reporter: What do u think about the traffic problem in egypt?
>>Taha: Very big broblem.. very much cars.. u see?.. but za guvurment
>>is trying to make it bettar..zey did za circle street and za me7war
>>street.. and zey make all streets one way so if u go..u cant come
>>back..niahahaha3
>>
>>
>>
>>Reporter: What about the economic problems in Egypt?
>>Taha: I do not undurstand what u say
>>
>>
>>
>>Reporter: I mean.. how do u deal with money problems in egypt?
>>Taha: No NO NO..egybt very rich cantry...we have alot of
>>cotton..alot of water.. and we have byramidz
>>
>>
>>
>>Reporter: So do u make a lot of money?
>>Taha: No no.. it is not legal to make money..one frend i know make
>>money at home.. and he go to brizon..if u make money at home..u can
>>only give it to za banzeena man..they take any money
>>
>>
>>
>>Reporter: let me rephrase..since Egypt is a rich country.. do u
>>have a lot of money?
>>Taha: me?! ..Not a lot.. but I eat and drink Al7amdulelah?
>>
>>
>>
>>Reporter: Then where does all the money go?
>>Taha: Guvurment
>>
>>
>>
>>Reporter: And what does the government do with the money?
>>Taha: Zey Build circle street,me7war street and make all streets
>>one way
>>
>>
>>
>>Reporter: well , Ok...Do u vote?
>>Taha: What duz zat mean?
>>
>>
>>
>>Reporter: Do u choose your president
>>Taha: Mubarak?
>>
>>
>>
>>Reporter: yes
>>Taha (nervously): I didn't give my voice..but if i was..i will give
>>him my voice
>>
>>
>>
>>Reporter: Why him?
>>Taha: Because he was an airoplane in za war..he waz za leadar
>>airoplane
>>
>>
>>
>>Reporter: But there r no wars right now
>>Taha: But if we have war..u see?...we know we will have a very good
>>airoplane in it
>>
>>
>>
>>Reporter: what about the last 26 years ?
>>Taha: I got marry.. and have 3ala2 and Amira..and drive taxi
>>
>>
>>
>>Reporter: No, I meant what did Mubarak do for Egypt in the last 26
>>years
>>Taha: He build circle street,me7war street and make all streets one
>>way
>>
>>
>>
>>Reporter: Thank you very much for ur time Mr. Taha
>>Taha: No broblem, only 10 bounds
>>
>>
>>
>>Reporter: I never said i will pay u for this
>>Taha: Ok.. just give me the (job) then..we smoke ,and make head
>>
>>
>>
>>Reporter: Grrrrrrrr
>>Taha: ok ok.. need a Taxi?

أ ســـــــا مــــة

2007-04-23T23:46:00.000+02:00

من حبة ايام كده

كنت عصي النوم شيمتي السهر وليس للهوى أي نهي عليا ولا أمر بتاتا

لأني بحب لما الدنيا تضلم في خلقتي أتبع النظرية الخزعبلية المصرية اللذيذة
شد اللحاف على وسطك غيره مايفيدك لابد عن يوم هيجي والهموم تسيبك
انت تدوس الريموت على قناة تفيدك أهون عليك ياولد من كتمة غيظك
خير اللهم اجعله خير لقيت قناة بتقول انه فيلم ياباني
قلت جميل أو يا شكا وكا يااااااااااع طخخخخخ
ببص لقيت الفيلم اسمه أسامة

بتقولوا مين ياولاد أسامة
وكمان مكتوب بالعربي
ولطشة هبل كمان ع الوش الابطال أساميهم بلغة اللي هيا اللهم احفظنا
أنا عربي ومش عربي..... مشيها ياسيدي

مشهد واحد

بدأ الفيلم بشارع تراب فيه راجل باينه خواجة عن البلد دي

ماشي بيصور( سياحة يعني ) دخل عليه واد صغير لابس لبس هنود أو أفغان

شايل بخور وقاعد بيقول تعويذات حابس كابس وبركة سيدنا الخلفشعي
علشان يآخد منه فلوس وانسجموا أوي ده صور وده خد فلوس
وفجأة الشارع ضرب مظاهرة كلها ستات متغطية في اسدالات
رافعين يفط عايزين نآكل عايزين نشتغل
ومحناش تجمع سياسي
واذ فجأة أن أن أن
طلع ناس كده مسلحين بخراطيم ميه (مش في ميدان التحرير) وفرقوا المظاهرة ورشوا الستات
بمنظر مهين جدا لدرجة الاطفال الرضع وقعت وبقت تجرجرهم المية مع الوحل
وبدأت تظهر الصورة ان دي أفغانستان تحت حكم طالبان
ومن الناس اللي كانت بتجري بطلة الفيلم بنوتة معدتش عشر سنين وأمها
استخبوا في بيت مهجور واستخبى معاهم الواد الرزل بتاع البخور
وقفل المشهد على نظرة البنت من ورا الباب للعساكر وهما بيجرجروا الستات وبيحطوهم
في عربيات عاملة زي عربيات الانابيب أم حديد

مشهد اتنين

بترجع البنت وأمها للبيت وتروح البنت لجدتها مذهولة

بتنام على حجرها بضفايرها الرقيقة وبتحكيلها الجدة حواديت

ع الناحية التانية الأم بتقلب صور قديمة لجوزها اللي مات وبيظهرأن سبب المظاهرة
ان الستات دول رجالتهم ماتت في الحرب
ومش مسموح بالعمل للستات غير كممرضات بس وفي مستشفى الحكومة

وبيقفل المشهد بجملة من حدوتة الجدة عن الايمان بالقدر

وزرعة جميلة في البيت رمز للبنت

مشهد تلاتة

المستشفى وبعض الطبيبات الخواجات بيتكلموا مع ستات البلد والممرضات عن الحرية والثورة

والظاهر كان ليهم دور في تحريك الجمهور النسائي للمظاهرة اياها

بينما الأم الممرضة قاعدة معاهم كده (زي احنا بتوع الأتوبيس) وفجأة العساكر جم

هب هب لموا كل ممرضات ودكاترة المستشفى

فعملت الست بتاعتنا حركة لذيذة انها من أهل عيان وبتعيط عليه مركبنله محاليل

والظاهر انه مات

وخبت بنتها جوة الاسدال بتاعها مع نظرة رائعة للبنت من جوة الاسدال الى نزول نقط المحلول كأنها باعث للحياة

وبيقفل المشهد على طفل مصاب بشلل أطفال ماشي في المستشفى

مشهد أربعة

بدأت العساكر تدور ع البنت وامها اللي هربوا م المظاهرة

تظهر البنت على رجل جدتها تاني لكن ضفايرها ع الأرض مقصوصة

علشان تبقى شبه الولاد وبتحط البنت ضفايرها مكان الزرعة الجميلة وبكل رقة بتحطها في الشمس

وتسقيها من محلول المستشفى اللي كانت أخدته فاكراة انه ده باعث الحياة

مشهد خمسة

وبدأت البنت تخرج تشتغل زي الرجالة مع واحد صاحب ابوها يقابلها الواد الرزل بتاع البخور

ويتعرف عليها بعد ماقصت شعرها فتضطر تديله الأكل علشان يداري عليها

لكن الفقري فقري(أكيد ليها عرق مصري)معسكرات طالبان تطلب الشباب الصغير
لحاجة كده زي معسكر اعداد القادة في حلوان قصدي طالبان

ويعلموهم مبادئ الحزب الطالباني وسبحان الله كانوا أخضر برضه

فتخش البنت طبعا في ذهول خايفة تتكشف

والقادة هناك مقلقين منها لأنها مش مركزة في موضوع الرجولة من حيث الهيئة

مين بقى اللي يدافع عنها ويعلمها ازاي تتطلع الشجر وتصطاد زي بافي العيال قلتلي مين؟ الواد الرزل بتاع البخور

ويقول ان اسمها أسامة وهو عارفها أو عارفه من زمان لحد ماتتكشف بعد كده

مشهد ستة

محاكمة فيها كل البلد

زي اللي كانت بتحصل في السعودية للقصاص

كل البلد بتتجمع بعد صلاة الجمعة في حاجة اسمها المسجد الجامع أو الكبير

السارق يقطع يده قدام عين الكل

والقاتل تتقطع رقبته

مشاهد تخليك بجد تنسى الجريمة أكيد بحكمة ربنا

قبل مابتوع حموم الانسان يتدخلوا ويمنعوا علنية الموضوع ده

المهم المصوراتي بتاع السياحة اللي كان في الاول خد اعدام

والدكتورة اللي عايزة تخلي الستات تصيع وتفك الحجاب اترجمت

والبنت بتاعتنا اللي كانت عاملة ولد خدت براءة

بس بقت جارية مملوكة لراجل كده عجيب فوق الخمسين

مشهد سبعة

الراجل بياخدها لبيته اللي عبارة عن قلعة محصنة متقسمة سكاشن واقطاعيات زي شهريار كده

وسابها مع أورطة ستات بالعبيط

منظر للبنت قدام المراية كل واحدة من الستات تدخل تزوق فيها حبة

وتحكيلها حدوتها مع الراجل الظالم ده

وكل أوضة في البيت عليها قفل لكل ست وعيالها

ولما جه العريس بالليل

خلاها تختار

شكل القفل والسلسلة اللي هتتحط على أوضتها

شوف الديموقراطية ياجدع

تصويت جماعي ع العمر اللي جاي

وبينتهي الفيلم بقصرية الزرع فيها الضفاير والمحلول بينقط عليها

والقفل الكبير والسلسلة الدهب والبنت بتبص لهم بذهوووووووووووول

بنت م الصعيد

2007-03-26T01:14:00.000+02:00

يمكن الوقت مش مناسب لحاجة زي دي دلوقتي

بس خلينا في نفسنا أحسن نتجنن م اللي جنبنا

ده يمكن المكان اللي اتصور فيه

فيلم مافيا

لأن تقريبا كل اللي نعرفه عن أسوان

عودوني ومافيا وبكار

ولما نحب نعمل مثقفين بنقول

عباس العقاد

بجد الناس دي أطيب ناس قابلتهم في حياتي

عمري ماقلت شعر

والناس مش عايزاني أنزل وأتوجرافات

ومش عارف أطلع أوضتي

وكأني تامر حسني

مع اني يمكن أغلى حاجة شايلها موبايل

ومش بتاعي كمان

وواحد لابس بدلة طلع يجري ورايا

في كواليس المسرح

فجريت منه كنت مفكره سمسم متنكر

لكنه حضني وقعد يبوس فيا

وكأني والدته بلغة الصعايدة انت مجرم

ففكرت برضه انه م الامن وهيقبض عليا

بعديها سابني ونزل ومكلمش حد غيري

فبالهواجس اللي معششة جوايا

قلت اه اخترني من وسطهم

الرسالة وصلت ياباشا

وطلع في الاخر

رئيس جامعة أسوان

والراجل اللي بيشد ستارة المسرح

ندالي وقاللي لولا اني واقف

كانت بنتي جت باستك

طبعا عملت زي الطماطماية المفعصة

وقاللي اكتبلها أي حاجة ذكرى

لأني اتخذت قرار اني هوقف مخي شوية

واحد طلع قال كلام الناس حبته

هي الناس عبيطة ولا هو اللي جامد

واذا كان جامد يستغل السلاح ده ولا يعينه

ولا ده مش مكانه ودي مش دنيته

سؤالات ملهاش نهاية في كل حتة

بس بجملة الغم اللي الناس فيه

قلت لوفي ايدي أبسطهم هعملها

عشان كده بعت البوست ده

يمكن ده رد على قصيدة بنوتة

صعيدية طلعت قالتها

لما كنا في قنا

في عرض الملتقى الثقافي العاشر

للجامعات العربية

كان كلام جميل بس قاسي شويتين

على الرجالة وتصرفاتهم بيقلدوا فاندام

وتطالب بعصر سي السيد

فطبعا الرجالة سخنت

وطالبت بالتار

يمكن الصعايدة قبل الغرب

واتلموا عندي في الاوضة

ولازم تجيب حقنا

فطبعا أنا مسالم

وبموت في المرأة رفضت

لكنهم ألحوا

فكانت دي يارب تعجبكم

الرأي محايد جدا

وعجب البنات قبل الشباب هناك

ياريت تقروها بالصعيدي

بلدي بلد العجايب

فيها القصص حكايات

آخرها في جنوب الوادي

حدوتة ست البنات

زعلانة من صنف الشنبات

بتقول عليهم ناس خواجات

لا عاجبها اللي ع يضرب جل

طب قبله بصوا في المرايات

ده لانير والتاني شادوف

وطقم حلل وغطاه مكشوف

لو مرة يتحضر كله

يطلعلي جني مهوش مصروف

ولا كان عاجبها الواد فاندام

مع انه يعني شكله تمام

هو اللي يهتم بروحه

دلوقتي ياخلق يبقى حرام

غلطان أنا وغلطي لابسني

وف كل حتة بينحسني

هعمل أنا فاندام على ايه

آسفين ياست سعاد حسني

عايزينه تاني سي السيد

موجود بزر يتجدد

بس الأكادة مفيش تعليم

ولا فسحة حلوة ونعيد

قالوا وقالنا في الامثال

رحنا وطفنا بميت موال

عارفين مقام ستي المهرة

لكنك ايه من غير خيال

جوايا نخوة وكرامة

لا بقولها رسم ولا دراما

لما بحب بحب بجد

مالزمش لحبيبي علامة

حبيبتي دي بريدها حكاية

جدعة وأصيلة بكفاية

لايجي يوم وتقول مليت

وتجيب لأحزاني مراية

لاتقوللي بابي ولا مامي

وفلانة دي جوزها حرامي

لو غبت يوم براة البيت

عارفة أصول طبعي الحامي

ماحناش ملايكة ولا شياطين

ولا انتو يعني الحور العين

ده حتى ورد الليل فيه شوك

وفكل خلقه في الصنفين

ياستي آنا

وتاج الروس

جوايا نبضك صوت محسوس

ونهايته مهما ألف وأحوس

هفضل بِِحُبك طير محبوس

صاحب الفكرة عازف العود من فريق المزيكا جامعة المنصورة

وشارك في الكلمات مع حلاوة

حــبــة جــد

2007-03-11T02:33:00.000+02:00

كـنــت فاكر إني هقــدر يــوم أفـــوت

وإنـي هحفر يا مَا إسمـك في الحــواري

وع البـــيـــوت

بس لما شــلـت هــمــك

وارتويــت من نبع غمك

كــلبــشت فيا القــيود

انت .... يابني

يا للي حـابس نور عيـونـك

جوة غابـة

اِصحــــــــــى يابا

الحياة دي مش كآبة

مـــــش خـــرابـــــة

وسط شبكة عنكبوت

مش خرابة ..لأ خرابة

والغلابة عاشوا فيها

يآكلوا مش يمصوا دود

الغلابة ياما عاشوا ويا ماتوا ومنتهوش

لو هتيجي يوم تزورهم

تلقى ضحكة..ضحكة عايشة ع الوشوش

هي ........ ضحكة

بس بايشة ..... بين دموع

ناس غلابة لما تضحك

راح تجوع

لا يا صاحبي ...... ضحكة دافية

ضحكة طالعة م القلوب

ضحكة خلت تل هم كبير يدوب

ألا قوللي

حلم جيلك ليه تملي شمسه عاشقة للغروب

!!!!حلم جيلي

حلم نايم ...... ع الرصيف

كله أمله بت حلوة بين ايديها يعيش عفيف

هو فعلاً حال بلدنا حال يغم

بس برضه اللي عايز يبني نفسه

مش هيفضل ...... نص كم

بكرة تكبر

!!!بكرة أكبر

لسه نونو وشعري شايب

حتي ضحكي حلم خايب

لمّا هكبر... راح أسبها

وما أفكر يوم آجيلها

هاجي أقولك ...... اغتنيت

يا حبيبي كله واحد

واللي عمره ما داس في أرضه

يبقي ضيفها مهما يبني أو يضيف

ثم انك ناسي حاجة

ناسي انك .... راح تموت

وان اسمك بكرة يبعد م الوجود

بكرة تعرف

ان عيشتك .... زي موتك

صرختين ملهمش صوت

كنت بحلم أبقى فارس

وأبقى ليكي يا مّا حارس

بس ضعفك

شل ايدي ... شل عقلي فاعذريني

شوف ........ يا صاحبي

دي بلدنا ........ واحنا ليها

بكرة نكبر ........ نحتويها

لو نسيبها ......... مين يجيها

written by halawa & hameed

الـكـنـز

2007-03-10T04:39:00.000+02:00

ياليل م الحب صاحي

ومن الشقى نعسان

على كل طوبة ندى

وشذى وأمل انسان

من الضلام في الضي

ومن العطش في الري

من ألف حي وحي

من ألف عام وأنا عايش

في الزمان الجاي

كلمتين جامدين سمعتهم من وجيه عزيز هزووووني

وافتكرت ساعة أما كان بيحكي مع منى الشاذلي عن حفلة

كان طالعها والناس شتمته فقعد يلحن الشتيمة

وكمل غنى والناس سمعته ونجاوبت معاه

وأكيد هما دول أكتر ناس اتكلمت عنه وعملوله دعاية

قرار أخده في لحظة كانت انهيار

ولو نزل ومغناش هيفضل مهزوم في نظر نفسه

واجه خوفه بطريقة بشوف الدنيا بتحطنا فيها علطوووووول

اتنين واقفين قصاد بعض كاوبوي أمريكاني

كل واحد في ايده مسدس فيه طلقة واحدة

النجاح والفشل..ولازم قرار...وأين كان

صابت ولا خابت أوحتى لوخدت جرح صغير

فأنت اللي شايل الليلة

وده وضع مفروض علينا رسماه الحياة

ممكن نهرب منه..بس هنبقى للأسف خارج الخدمة

وممكن نهرب ليه..وأكيد في دقيقة حتى الخط هيجمع

احنا فعلا بندور على بكرة في الزمان الجاااااي

أنا يمكن شايف له ملامح ..الحمد لله ..وصلنالها

وده مش تفاؤل..اوعوا تفهموني صح..دي مش أخلاقي

وصلنا لمعطيات بكرة يالجروب ده..بالناس دي ..بوش مصر الحقيقي

مش بتاعة تامر وعمرو وشريف صبري

صورة الحارة المفتحة ابوابها على بعض بكل قيمها

ومبادئها وأخلاقها

أرابيسك..بيتكمل حبة حبة

ساعات أما بزعل بخش أشوف البلوجرز كاتبين ايه

مين بعت

لازم أروح... ده معاد بوست فلان...ياترى مشواره تم ولا

صحي م النوم الصبح بالليل؟॥عملت ثورة؟

النحلة قرصتها؟

راحت سيتي ستارز؟॥قلمه طفح؟

جالها عريس جديد..كتب قصيدة؟

عيان...بتولد...فرحه فين؟॥

لسه زعلانه.؟..اشتغل ولا لسه

نجحت..عمل ايه في الامتحان..دراعها مكسور؟

قابلت محمود سعد؟

حتى لما بتتهز ثقة الواحد في نفسه

بيرجع تاني يقول لنفسه...أنا أعرف الناس دي

يقلب صور..يقلب بوستات...يشوف فيديوهات

أنا صاحب عاشق وسكايار ومستكنيص واللهو الخفي

وعبد الحي وميدو ومؤمن وخفة دم

واخواتي ثورة وكلماتي وديو برايد وترو ثينج

و وخوخة وسوسو وماهي وزوز وروفي ورومي

وبطوطة وجميلة وباقي الكاست

هزعل ليه خايف من ايه

حتى الناس اللي ماشفناهمش سمراء النيل ومحض روح

وبرااااااااااااايد

في معنى جديد بيتولد .....جوااااااااانا

ومش هزعل لو محققناش اللي عايزينه

وكان حتى الكنز في الرحلة...أعتقد يكفي

صابر راضي شاكر قانع

بايس ايدي وش وضهر

في كل حارة ولد عترة وصبية حنان

وكلنا جيرة وعشرة وأهل وخلان

أصل الحكاية حكايتنا ابني الانسان