Saturday 17 November 2007

أبـويـا .. في الخليج

معرفش ليه كل أما أشوفك
بحِـس إن اليوم سعيد
بلقانى فـرْح طارح في قلب

خلالى ليلة الحزن عيد
يمكن بـعـيد
لو يوم أنا أقـدر أزيـد

بس الأكيد
حـُبك سَاكــن لي في الوريد

وحشاني صورتك ع الحيطان

رغم إنها في نفس المكان
لكن تبان كـِـبرت قوي
من يوم مارحت ده الخليج
إياك تكون فاكر قوي

شرخة دموعي بتـتـلوي

بجهاز جديد

أو نوكيا م النوع العنيد

خلاط عشان ست البنات
شنطة وجيبة وغويشات

غلطان كتير غلطان قوي

ده كل لحظة بـتـنـِزوي

في ست عايشة بـتـتـكوي

بتشيب عـَجـَز
عـمّالة تـجـري وتـتهرس

حاضنة دموع صوت النفس

لو يخفى يوم طعم الونس
أو تيجي جـُـثـة مـمـددة


فــاكـر زمــان
لما تجيب لي فروت سلات

من عند ده اللي اسمه البارون

وأروح وأجيب بفلوس كتير

حلاوة نوع الشيكوبون
لـغـمطـت وشي بألف لون

تضحك تقوللي عليك جنون

حسيتها بيك ريحة الأمان

وانت كمان
تلقاني ليك ظهر وحنان

يسوى ده كام
كـيـلـو الحنان

ولا الأماني والأمان
تضرب لي سعـر
هــزيد عليه

السهم طالع ولا نازل ولا إيه؟
يسوى ده كام
انك تعيش
ملكش أرض
عمال تـلـِف من السنين
في حلـم فـرط
جربت تحضن فيزا كارد؟؟
جربت أحضن فيزا كارد
ردوا الحنان ملهش قـرض
ازاي تـعـِد سنين طوال
سـتــْـرَالـي عـــرض
حتى أما شفت
البنت ليها
قـلبي ماااااااااااااال

خـُفـت أبـتـلـيها بالعيااال
ونعـيـدها نفس التجربة

وأهرب
وأسيبها ع الخليج
باين نسيت
حتى في زمـــاننا
مفيش خليييييييييج

38 Comments:

Blogger Romantica said...

الله يخرب بيتك
برضه جثة ممددة انت معندكش .....
حسبي الله ونعم الوكيل

17 November 2007 at 13:44  
Blogger Romantica said...

استني بس عليا لما اروح الدرس وارجع اهزاك

17 November 2007 at 13:45  
Blogger sakayar said...

ما كنتش عايز أعلقك ... وكمان مقدرتش أعلق ... فاتح بلوجتك والسماعات على وداني وبفتح بلوج همبكاوي وبقرا الشعر لقيت ميوزيك اللقاء الثاني .. اتفتحت في العياط
رينا يسامحك بداري وشي م اللي حواليا
الوحيد اللي بيقلقني عليه والوحيد اللي بيعيطني
جامدة أوي ... يابن البيت الكبير...اقصد يا صاحب البيت الكبير
تحياتي يا فندم

17 November 2007 at 14:17  
Blogger Menas said...

حلاوه
دخلت والله عالطول
مالك؟؟؟
ايه اللى مضايقك
وايه اللى شاغل تفكيرك
وقالبك كده
ان شاء الله هيجى اليوم اللى هتبقوا فيه كلكم مع بعض من غير فراق
بس برضه مالك
حاسه ان مش ده الموضوع
وانت عارف انى بحس صح

روق كده

17 November 2007 at 17:13  
Blogger Menas said...

تيجى نقلبها سعاده شويه
يلا قول ورايا
الحياة حلوه بس نفهمها

الحياة حلو طول ما انتم فيها

17 November 2007 at 17:14  
Blogger Menas said...

طب اجى اطبطب عليك دلوقتى ازاى
روق بقى

روق
بقول
روق

مسمعتش

طب اضحك
طب اقولك ايه عشان تضحك بس
روح شوف اخر بوست لبطوط وشوف ردودنا فيه كلها وقرائها كامله وانت هتنفجر ضحك
روح بقى

17 November 2007 at 17:16  
Blogger الحلم العربي said...

جامدة جدا يا حلاوة
تبا لأموال الخليج ...تسلبنا أعز الأحباب
تحياتي

17 November 2007 at 20:07  
Anonymous Anonymous said...

انا معاك انه يبقي معاكو بفلوس الدنيا دي كلها بس افرض ان هو مرحش الخليج وقعد في المحروسة باي وظيفة كنت هتكتب برضه وتقول هو ابويا ليه مرحش الخليج وجبلنا شوية فلوس بدل اللي احنا فيه 0000وبس

17 November 2007 at 22:01  
Blogger Halawa said...

رومانتيكا

ايه ياعم عارف انها صعبة
بس بجد بقالي فترة
كل لما أكتب حاجة تطلع قاسية
أعمل ايه؟
مش بإيدي
عايش في مزرطة الخلاط لحد ماعفنت
ههههههههههههه

لادرس نافع
ولا نظري نافع
روح ذاكر يااااااد
أما نشوف هانم الطحان
هتطحنك ازااااااااااااي

عايز نقد أدبي يا معلم

18 November 2007 at 03:01  
Blogger Halawa said...

سكااااااااااايار

معلش عارف
ان الكلام حراق
انت عارف كلامي مليان كلور
بيحرق في العينين
هههههههههههههههههههه
انت عارف بقى كل الكلام
لما بتقلب
بتبقى مهلبية
ممكن أنزل كل يوم بوست دلوقتي
قرفت بجد
نفسي دراعي يتكسر
هههههههههههههه

فاكر حندولة
اللي كنت حكيتلك عليه
لما كنت أقراله أي شعر كان يعيط
كنت أستغرب جدن
وأقول عليه مش طبيعي
ودرات الأيام
أصابتني اللعنة
بقيت أكتب وأعيط
هههههههههه
كاس بيدور بقى

متقلقش مسير الحي يتسفلت
وعمر السافل مايتأدب
ههههههههههههه

سمعني أخبار حلوة بقى يا أخي

18 November 2007 at 03:07  
Blogger Halawa said...

menas

باشا ازيك انتي عاملة ايه؟
كنت بستأذنك
في البوست ده ينزل ولا لأه
وآسف لو كنت قلبت مواجع

متقلقيش عليا
أنا بخير
صحيح في حاجات مضايقاني
بس عادي
بنسى وبعيش
احساسك صح
ربنا يخليكي لينا جميعن
وتشكرات عالية قوي ليكي
ولستي بطوطة

يارب أشوفكم أسعد ناس في الدنيا
ويرزقكم بولاد الحلال
بدل ماأنتوا
قاعدين في أرابيزنا كده
ههههههههههههههههههه
فرحونا بقى
وحشنا الفرح بجددددددددددد

حاضر هشوف البوستات دي
عينياااااااااااااا

سلمي على ماهي
هيا فين ؟
خليها تقرا اللي فايتها لو فاضية

تحياااااااااتي

18 November 2007 at 03:15  
Blogger Halawa said...

menas

صحيح أخبار مي ايه؟
ازاي ملهاش بلوج
وهي اللي كانت بتكتب
ممممممممممممممممم

سلمي عليها وقوليلها لازم تنزل شغلها
حرررررررررررررراااام عليها بجد

مش كل يوم
هكتب لوحة ع الحيطان ايديا وجعاني
هههههههههههههه

سلامات ليكم جميعن

18 November 2007 at 03:18  
Blogger Halawa said...

الحلم العربي

تبا تبا معاكي للصبح
بس مش هنعيش من غيرها
فلوسهم كتيييييييييير
القربة مخرومة
والمعادلة بايظة
خربانة خربانة

محتاجين معجزة
مممممممممممممممممم

شرفتي وشكرا ليكي

18 November 2007 at 03:21  
Blogger Halawa said...

tooota

محدش عاجبه حاله
لا اللي قاعد نافع
ولا اللي سافر نافع
معاكي مش هقولك لأه
كنت فعلا هقوله ساعتها
عايزين نآكل
وأقوله سافر يامجوعنا
ههههههههههههه

بس العمر قصير
في ناس بتسافر
تعمل حاجة وتيجي
انما الغالب ودول نص أهلي
من جيل شباب السبعينات والتمنينات
بيفضلوا لا عملوا حاجة هنا ولا هناك
لحد مايجوا ويتصدموا
بكل التغييرات
اللي معدوش فاهمينها
مركزوش وعملوا حساب يوم رجوع
راح وخلاص واللي يحصل يحصل

آهو كلام لا يودي ولا يجيب
هه تصبحي على خير

18 November 2007 at 03:28  
Blogger نبع صافى said...

انا داخله ولابيه ولاعليا
فجاة
لقيت جديد
جاااااااااامدة جدن ياحلاوة باشا
ابن نكدى نكدى
بكيتنا بجد
مشاعر جامدة اوووووووى بجد تسلم وان شاء الله ربنا يجمعك ديما
عجبنى اوووووى
يسوى ده كام
كـيـلـو الحنان
ولا الأماني والأمان
تضرب لي سعـر
هــزيد عليه
السهم طالع ولا نازل ولا إيه؟
خليت المشاعر بالكيلو
وفعلا الواحد حاسس اننا بجد عايشين بمشاعر بالميزان جااااااامدة
حلاوة ربنا يروق بالك وخلى بالك من الاطفال واطفالنا امانة بين ايديك
دا انت ياباشا امل اولادى
ههههههه نسيت ولاايه
بس لما توصل افتكرنا وبلاش الزهايمر يجى
سيبها لله وتوكل
واكيد عارف ان دا مابايدينا حكاية الغربة دى سلام
ياباشا ياباشا
ودمتم بخير وسعادة

18 November 2007 at 08:22  
Blogger ♥ BaToOoT ♥ said...

بص بأه ياستاااااااذ حلاوه
عشان بجد ده كتير
اولن مش عارف مين اللى انتحل اسمى ودخل يقول انه طوطه ده

يافندم انا طوطه بس

احم احم

انت عارف من يوم ماانا جيت هنا وانا لاقيه كل المصريين متغربين وكلهم سايبن بيوت فى مصر وولاد وبنات فى الكليات

بلعن ابو الغربه وامهااااااااا
عارف وربنا فكرت انى ابعت لكو كلكو باهاليلكو تيجو كلنا نعيش سوا معاهم
مش عارف ارد
انا قريته امبارح ومش عرفت اقول ايه ولا عارف دلوقتى اقول ايه
بس حاسس باللى فيه عشان الراجل بابا
ايام ماكان هنا لوحده
عارف بالرغم من انى سايب كل حياتى
بس فرحان لان بابا قالى كلمه هزتنى عيطت منها جامد بس مش قدامه طبعن
انتى لما جيتى موتى احساسى بالغربه فى البلد دى
ياااااااااااااه
بكره مسيرنا نتجمع كلنا ومش نفترق بس
هما بيعملو كده عشانانا
مافيش حاجه فى مصر تتقارن بفرص هنا بس لو لقيت الفرصه دى وسبتها يبقى انت قصرت فى حق ولادك
تقريبن

سييبك انت مافيش احلى من ايامنا دى
خلى باالك منهم انت وحسسهم ديمن انك محتاجهم
وربنا يجمعنا ديمن على خيرون
ويقرب كل البعيييييد
ويلم شمل المتغرب
ان شااااء الله خير

مش كل شء بيفوت فى عمرنا بيجرح
قلب الحيااااااه ملياااااااان
حاجات وبتفررررررررررررح

وزى ماهيا حبها
اشوفك على خيرون

ان شاااااااء الله الفرح قريب صدقنى
كلنا بكره هنفرح صحبه ولمه وعلى ضحكه
فى رعايه الله

18 November 2007 at 22:46  
Blogger WhItE HeArT said...

ازيك ياحلاوة باشا عامل ايه وبعدين تعالى قول لي انته مين بس اللي سماك حلاوة شريف قال لي قصة طويله عريضه ولا فاهم منها حاجة

المهم انته ازيك وعامل ايه وايه اخبار الباطنه انته كمان انا بقيت احس ان الباطنة دي عقده او حاجة والله اعلم

بص بداية انا مش عارف اقول ايه بس
اللي ممكن اقوله ان الكلام تقييل تقييل ومركز كمان

ربنا يخليكو لبعض يارب

18 November 2007 at 23:56  
Blogger ♥ BaToOoT ♥ said...

انا جه تانى

حلاوه بجد انا بتماسك هنا عشانكو
بتمر حجات كتيره جدن عليا حاجات محدش يعرف عنها اى حاجه
بس بعديها عشان اعيش وارجعلكو تانى
بس لما بلاقيكو كده
يبقى اللى انا بعمله مالوش اى فايده ومالوش لازمه تعبى وتماسكى ده
لو كلكو فضيلتو كده مش عاوز ارجع هخلينى هنا
بجد والله مش بقول كلام وخلاص
انا شفت حاجات وحصلى حاجات مش لازم تعرفوها
بس عشان خخاطرى بلاش اشوفكو كلكو كده
بجد

فى ناس كنتو انتو سبب قوتهم وتماسكهم
فكرو فيهم لحظه
مش انانيه
مش عارف هى ايه باه
بس هى حاجه
مش فاهم باه المهم تفمونى انتو
خدوة بالكو منكو كلكو
وعشان خاطرى حافظو على بعض
عشان خااااااااااطرى
وابقى روح شوف بوستى اللى فى الدرافتس
وانا علىف كره منكن انزل بوست كل يوم
وكل بوست ااقسىى من اللى قبله
بس عشان فى ناس تهمنى وناس مش احب اشوفهم زعلانين عليا او قلقانين عليا
مش برضى
]ده انا بتقطع لما بشوفكو كلكو كده
وبتمنى اكون انا اللى بيحصلى ده ولا اشوفه فى حد فيكو او فى اخواتى وماما وبابا
وماتنزلش دموع الناس تانى
فى رعايه الله
واسف على طريقتى

18 November 2007 at 23:57  
Blogger MaMaDo said...

قول بقى ان انت طمعان فى الفروت سلاط
و بعدين دا كان فخفخينا مش فروط سلاط
هو كان فى زماان الكلام ده

العصيده حلوه بس الاحساسات دى مش عجبانى
جو المذاكره و الاربع حيطان بليل لما تخلص مذاكره و النور الى بيخف و الصوت الهادى او السكون
مع خروج من قرف المذاكره
و صوت منير
مود مش لذيذ
..
و بعدين ايه الصور دى
مش كنت تقول كان الواحد بعتلك واحد تانيه
بس وحشتوننننننننننننى اوى
انا اتخنقت من الحياه هنا
بس يلا محدش بيخدها بالساهل
كنت مضايق اوى وخنوق و بالصدفه ببص على البلوجيه و لقيت البوست ده فكيت اوى
و قعت افتكر لما كنا بنخرج و لما اكون زهقان و اعدى على حد فيكو و نقعد نتكلم و اخرج من المود الى انا فيه و افك
هو انامش هخف تانى يا حسن ههههه
ايه يا عم جو الكئابه ده

يلا خير
انا جى عالاتنين كده
ذاكر بقى عشان اعرف اجى اقعد معاك
سلااااااااااااام

19 November 2007 at 00:25  
Anonymous Anonymous said...

أنا قولت أجى أتفرج إيه اللى حصل بالظبط..لينك إيه اللى كنت بتتكلم عنها.

والله يا حلاوة أنا مش حاكدب عليك..أكيد طبعا حاجة كويسة ان حد يضيف لينك البلوج بتاعتك عنده.بس دى اخر حاجة كنت أتوقعها..ده من أكتر البوستات كآبة و قرف ف حياتى يمكن عشان له ظروف كده بفكر أحكيها ف بوست تانى.

المهم انك اسعدتنى بجد و أتمنى انى أكون عند حسن ظنك.شكرا يا حلاوة :)

19 November 2007 at 10:54  
Blogger Halawa said...

مولاتي صافي هانم

ههههههههههه
نكدي فعلا عارف نفسي
ربنا يخليكي
أولادي أمانة في رقبتك
سيبي أطفالي نايمين
دول ملهمش حضانة
دول أطفال شوارع
هههههههههههههههه
فعلا لما أوصل السعادوة يادوب
هبقى أفتكركم
أوصل فين يا أمي
محدش هنا بيوصل
كلنا بنجري لحد مانموت
المشكلة لو ليك ديول
انما لو متغرب بروحك متفرقش كتييييير
أو في حاجة ترجعهلها او حد مستنيك
انما غير كده متفرقش

تشكرات ليكي وحشتينا بجد

20 November 2007 at 01:42  
Blogger Halawa said...

batooota

عارف انه مش انت يا باشا
ده حد تاني
عارف انك هتحسي ده
أكتر واحدة لأنك في الجبهة دلوقتي
ابعتيلنا بس ياريت عقود عمل
ههههههههههه
بأي سعر مش فارق
ربنا يخليلك أبوكي
عارف ان الشحاتة في أي بلد
احسن من مصر شفت ده وعشته
15 سنة موجود هناك
ومتابع عشر سنين مستمع من هنا لحد دلوقتي

تشكر ياباشا ومنور بجد
ربنا يخليك لينا جميعا
يا ضحكتنا الحلوة

20 November 2007 at 01:47  
Blogger Halawa said...

وايت هارت

ازيك يا باشا
أخبارك لما أخلص امتحانات
هاجي أقعد عند شريف شوية
ممكن نبقى نتقابل
ان شاء الله
فعلا أمي سمتني وحااااااااشة
بس أبويا سجله غلط في الشهادة
ههههههههههههههه
ليه ياعم مفيش حاجة صعبة
باطنة ايه
كله بيفوت بس المهم ميفوتش ويسيبك
أمال الحمير قصدي الدكاترة دي كلها مننييييييييييييين
أكيد ذاكروا وعدوا تبقى بسيطة

أشوفك بخير تحياتي

20 November 2007 at 01:52  
Blogger Halawa said...

batooooota

اهلا بيكي تاني
لا يا باشا
كنت عايز أقولك حاجة
يا ست الكل يا بني آدم نظيف
حلاوة مش كأبوا أوي كده
عادي زي أي حد
انتي مش ممكن تبقي مبسوطة
شوية بالنهار
واالعصر تقريفي
وبالليل مثلا تعيطي
وممكن ميكونش حصل حاجة ليكي
مجرد تغيررات مزاجية مش أكتر
وبعدين حالات الكتابة
مش ضروري تكون حقيقية
فكرة وعاشت جواك كتبتها
حتى ممكن متبقاش زعلان
ولا حاجة بس خدت زعل حد
حولته كلام يفرح أو يزعل

ربنا يحميكي من اي شر
آسف اني قلت
هبعت بوستات حزينة كل يوم
أنا بهزر مع سكايار مش أكتر
بس بجد مبحبش أمثل
انا مقريف بقول
محبش أمثل اني مبسوط
لأني هتفقس وكمان مبحبش كده
بس مبقاش انسان ممل
فرحان علطول أو كئيب علطول

أوعدك مش هزعل حد تاني
وربنا يسلمك من الزعل والهموم
ويفرحك بكل اللي تتمنيه
الناس بخير متقلقيش
كله بيتعلم دنيا محدش زعلان من حد
ده وضع طبيعي
الناس بتكبر واهتماماتها بتكبر وتختلف
زمان كنا من سن بعض بدماغ واحدة
دلوقتي كله بيجري في اتجاه
بس بنتقابل أوقات لما نفضى ونوحش بعض
ما تقلقيييييييييييييييييش

شكرا ليكيييييييييييي
قول يا باشا كل اللي عندك
البيت بيتك
حقك تقول اللي عايزه


سلامااااااااااااااات

20 November 2007 at 02:03  
Blogger Halawa said...

مامادووووووووو

كان في يا خويا فروت سلاط
ايوة انت مكنتش لسه اتولدت أساسا
ههههههههههه
عادي يامعلم بقى
الدهايمة في الشتا بتبقى مرعبة
أعمل فيها ايه
وديني التحرير وأنا أكتب حاجة تانية
هههههههههههههه

كل فضايحكوا عندي
اصبروا عليا
أخبارك الانتاج عامل ايه
هيتنقل أمريكا امتى؟
أكيد قفلتوا الدوري المصري
ههههههههههه
بالتوفيق يامعلم لف واهرس واتعلم
الواد مستكنيص عامل شغل
جااااامد في احنا دوس معاه
وشوفوا بسمة لو فاضية
الجو بتاع احنا بتهيألي يآكل معاها
كلكوا في مصر بقى
يا وااااااااااااااااااااااصل

تيجي بالسلامة
خلينا نشوفك
المحل في ميدان خطاب جااااامد
عملناله زيارة
كنا مستنينك
بس انت عارف الكيف بيذل
هههههههههههههههه

20 November 2007 at 02:08  
Blogger Halawa said...

كوين ايريسر

ليه ياعم بس كده
ربنا يوفقك ويزيح عنك
أي تعب
ده شرف ليا قبلك
اكتبي انتي أي حاجة
واحنا هنقرى ونعلق
وعيشي مع الناااااااااااااس

ربنا يوفقك

20 November 2007 at 02:11  
Blogger momken said...

الانبهار
حاله تجينى لما اجى ازورك هنا

الاعجاب
حالتى الدايمه لما بيجى فنك على بالى

العجز
حاله بتصيبنى لما احب اقلدك

الفخر
حاله بتصيبنى لما اقول لحد اننا اصحاب

العبقريه
الكلمه البسيطه الى اقدر اوصفك بيها

تحياتى

20 November 2007 at 16:57  
Anonymous Anonymous said...

طبعا انت عارف رأيي في اي حاجه انت تكتبها لانك ملك العاميه.القصيده طبعا روعه وانا رأيي انك متغيرش فيها حاجه لان الاحساس فيها عالي جدا حتي ولو كانت بعض الكلمات قاسيه حبتين بس بجد انت تعملقت في القصيده دي.علي فكره انت واحشني جدا شد حيلك عايزين نخلص ونصيع بقي.

20 November 2007 at 17:08  
Anonymous Anonymous said...

سلام عليكم
أولا
ازيك يا معلم و عامل ايه
ان كلمتك مرتين بس كالعادة
!!!!!!!!!!

ثانبا
أنا مش عايزك تاخد الفكرة اني لازم اعارض في كل حاجة
و بصراحة انا كنت ناوي معلقش خالص

على اساس ان ده موضوع شخصي أوي
بس بعد تفكير
لقيت نفسي مضطر اعلق

هل كان عندك استعداد تعيش الفقر اللي عاشه ابوك و تستحمل ؟؟؟؟

و بعدين لو أبوك كان موجود هنا و عايشين في المستوى العادي اللي أغلب الناس عايشة فيه
كان ممكن تكون انت و هو على نفس التوافق الفكري و النفسي الموجود دلوقتي على حد علمي ؟؟؟؟

طيب لولا انك سافرت الخليج و قضيت هناك فترة طويلة و بعدين جيت و خضت التجربة هنا بكل نجاحتها و فشلها بكل ابتهاجها و صدماتها كنت وصلت للي وصلتله دلوقتي؟؟؟؟؟

معلش فيه أخطاء كتيرة أوي بتحصل و ممكن متكنش مسئولية أي حد بس الظروف اللي فرضت علينا كلنا كده

بس العجيب ان نفس حالتك دي بتسيب أسر منهارة تماما مفيش أي رابط بين أفرادها
و كمان بتسيب اسر متماسكة أوي و يمكن تكون أقوي مما لو كان الأب موجود طول الوقت

تحياتي

20 November 2007 at 19:21  
Blogger السـيد شبـل said...

اولا .. انا واحد جديد لسه عامل مدونة
وبقالى حوالى ست ساعات متواصلة قاعد اقر اللى مكتوب
هتقللي بقللك ده لية؟
ولا اى حاجة..
المهم انا معاك ان الفلوس دى بنت كلب والناس بتضيع حياتها عشانها ... لكن ايه الحل فى ظل ام الراسماليه اللى احنا عايشين فيها
م الخر ما تزعلش من ابوك
وعيش انت يابني بعزق ف ام الفلوس
ا مستنيك تخش على مدونتى وهتلاقيلك لينك عندى

23 November 2007 at 02:53  
Blogger السـيد شبـل said...

انت يا واد يا حلاوة
انت معلقتش ليه عاللى انا كاتبهولك
المهم انا حبيت مدونتك ديه واضفتها عندى
---------------------------------
وعايزلى لينك محترم كده عندك
اكتب فيه ياواد ياحلاوة
---------------------------------
السيد شبل..بلا إسم
---------------------------------
بس بجد مدونة جميلة وانا على فكرة اخدت منك شوية صور

24 November 2007 at 06:38  
Blogger Halawa said...

momken

المسمرة في الكرسي
حالة تصيبني لما بشوف كومنتاتك عندي
ههههههههههه

بجد شكرا ليك
لأني بجد معرفش عنك اي حاجة
وانت مش سايب اي حاجة عنك

جايز يكون ده حلو
وعامل مساحة من الغموض
انك مش عارف تقيم
ده كلام راجل ولا ست
كبير ولا صغير

بس يهمني فعلا أتعرف عليك
وشرف ليا قبلك

شوف الطريقة اللي تناسبك
وأنا تحت أمرك
معنديش مانع واللهي
بس انا فعلا بمتحن دلوقتي
وهخلص أول اتناشر

شكرا ليك كتيييييير

تحياتي

24 November 2007 at 19:44  
Blogger Halawa said...

kimmooooooooooooooo

واحشني حقيقي واحشني بصحيح
تشكر ياريس
كلك ذوق ورقة واحتراااااااااام
هه سامعني
سامعني ايوة انت
بتدور وشك ليه
ههههههههههههه

عايز ألعب كورة جعان ياعم الحاج
لو لو ايه
ههههههههه

24 November 2007 at 19:46  
Blogger Halawa said...

واحد من الناس

وعليكم السلام
معلش ياريس انا اعتذرتلك
قدام الناس آهوو متزعلش بقى
بس بجد مش فاضي ومش رايق
ومش شايف ومش نايم
ومش حاسس ومش شامم
هههههههههه

لا ياجميل براحتك
يمكن قلتلك بزهق من الكومنتات التقريرية
حلو وكفاءة وكده
نتناقش مفيش مشاكل
بس الحدوتة هنا
مش شكوى أو اعتراض ع الراجل
أو فكرة السفر
لا طبعا انا شوارعي بحب السفر
انما فكرة اللا هدف دي حاجة
ثانيا
هو هتاب مع حد عزيز
زي عتاب مش لوم
بتضحك معاه بتغلس عليه
مش عايزه يعتذر أو يتظلم
أو حاجة لا مش كده
انما فرفوشة
زي كلمة
يرضيك كده يااااااااااه
كان نفسي أقول بوقين وطلعوا
بس مش مهم
هما ايه أو عن ايه
فضفضة طرقعة مغلسة مقلسة
مش شكوى أو نضال
ضد ومع ولذلك وكأن
لاااااالاااا
مش حاااااااادة قوي كده

ربنا يعمل اللي فيه الخير للجميع
نورت وتشكراااااااااااات

24 November 2007 at 19:52  
Blogger Halawa said...

السيد بك شبل

هلا بالمنوفية هلااااااا
يعني أحمد عز
يعني طلعت السادات
يعني سلامات سلامات
من هنا لحد الشلالات
ههههههههه

ربنا يجعل كلامنا خفيف عليهم
يارب ارزقنا بفلوس زيهم
لاااااا تحسسسسسسسسسد
بجززززززززز على سناني

منور يا باشا
معلش اتأخرت عليك
لأني بمتحن أطفاااااااال بعيد عنك
لما أفضى هجيلك
عينيا ليك يا ملك
ست ساعات كتير عليا وربنا

تشكر ياذوق
مش زعلان من أبويا واللهي
ويمكن وضحت وجهة نظري
في الكومنت اللي فوقك علطول
اقرااااااااااااه

تحياتي ليك وهضيف اللينك أساسي
ده شرف ليا ياجميل

انت تأمر
احنا بتوع المنوفية
بس ربنا يخليك
شغلني في أي وحدة صحية
هههههههههههههه

نورت

24 November 2007 at 19:58  
Blogger السـيد شبـل said...

شكرا يا حلاوة........
انت طلعت ف طب؟؟؟؟؟!!!!
زينا يعنى
الله يلعن ابو الطب وسنينه!!!!!!!!
اكيد انت بتقول كده برضه واللا ايه......
عموما شكرا ع اللينك يامعلم
........
والمنوفيه اه م البلد بنت ال...
اللى ماطلعتش غير حبة بهاي...

م
----------------------
طبعا باستثناء كام واحد انا من ضمنهم

25 November 2007 at 01:01  
Blogger Halawa said...

السيد باشا

ومش أي طب يا دوك
ده المنصورة
يعني عفاريت الأسفلت
انت فين تلاقي كلية ليها تلات بوابات
كلهم ع الشارع
ههههههههههههه
جناين ايه وواسعة
والمدرجات فاضية
لأننا قاعدين ع السلم

ده كل اللي أعرفه عنها
بروح ع الامتحانات

يا باشا لينا الشرف

25 November 2007 at 06:04  
Blogger Hannoda said...

جابني عنها ستاتس ع الفيس لجزء منها وجعني فعملت عليه سيرش فجوجل وجيت

كلماتك قوية وطالعة بصدق وصل دوغري للصميم.. تحياتي

18 September 2012 at 08:33  

Post a Comment

<< Home