Saturday, 22 November 2008

تعويـذه


تعويذة الضحك
اللي اترسمت على شفه نبيتي
مش قادره تكون
ترياق السم
من آخر مره اتشك
في روحه ب ناب أزرق
والقلب سامعله
دقه زياده
كما ترس وداير
من غير زيت
زغرط بالصدى
لسنين دخان
حازه سنانه
صابح يجرح
بشرار العشق..
وليلاتي تزوره
كهربا رباني
واصله في غيره
قاطعه في ذاته
بتحاول تجلي سواد السم
وتزيح أكاسيده
اللي اتمدت
والقلب معاند
من غير قصد
حالف يتحجب ضد العشق

3 Comments:

Blogger الحلم العربي said...

"حالف يتحجب ضد العشق ؟؟؟
جامدة اوي الجملة دي

و عجبتنى كمان " كهربا رباني " تعبير معبر أوي
لا انت بقيت جامد يا حلاوة لدرجة انك بقي يصعب على أمثالى فهمك
ماشاء الله
تسلم ايدك
بس تفتكر حتى لو حلف مليون يمين انه يتحجب ضد العشق هيقدر يتحجب ضده ؟؟ ما افتكرش
بس كويس انه ما يستسلمش بسهولة
تحياتي

23 November 2008 at 08:25  
Blogger قصاقيص said...

يااااااااااااااه
وأخيرا ...تعويذة
انا لحبها جدا وبعشق مطلعها بجد
والفكرة يايحيي جامده بجد
وبرغم العوان اللي هو برضو اول كلمه في المفتتح _عنوان ليه سطوته جدا_الا ان فيه سلاسه واسترسال في التراكيب
وللمرة التانيه هقولك ان:0

بتحاول تجلي سواد السم
وتزيح أكاسيده
اللي اتمدت
والقلب معاند
من غير قصد
حالف يتحجب ضد العشق

هو اكتر مقطع بعد المفتتح لامسني بجد
................
عزيزي:دمت بارعا في العزف علي اوتار القلب
..........
سلام ياقمر

23 November 2008 at 20:34  
Blogger sakayar said...

وبالمناسبة السعيدة دي أحب أقول وبكل اخلاااص
مش عارف أتف .. مش عارف أتف
الله يكون في عون أشعارك اللي بيوتها واقفة زي البرج المائل بس مائل علشان بيعمل بي بي

وأحب أصبح على كل الأشعار اللي بتضرب ف النفوووخ زي كده وأبعتلهم بحتة كده على الريق

صباح الكدب
متحني بنفاق الوش
متضفر نسايم غش
على يومك يا قلب حزين

صباح الذنب
بيطارد حنان بيخش
يتمايل ف وسط الشر
أحضانك تقول مواويل

صباح العتمة
مش لازمة
ولا نافعة
تجيب ف شموع
مادمت حرقت قلب أسير

بقولك إيه
صباح اللي بتصوصو ع الغصون

24 November 2008 at 07:40  

Post a Comment

<< Home