Tuesday, 23 December 2008

نزلـــِة عـشـق

من فضـلِك
وانتي بتتمشي
في كورنيش القلب
اشتري حاجه ساقعه
م اللي ف تلج
واحلفلك
رغم الزحمه وبرد الخلق
هتشوفي أعظم سرعة بخر!!
كام خطوة موج
على قلب الصخر
اتحضنت شبكه
ولا طرحِتش..
وفنار مرعوش
مهزوم الضل
اترجى في نوره مايغرّقش..
من خطوِك .. نوّه
بتحدّف شوق مليون خماسين
بتخربش جرحي ب ملح سعاده
و اما أتبسملك..
واتفادى الريح بالروح شمسيه
استهوى لوحدي ب نزلة عشق
ينحسر الموج
وبجزر مفاجئ
عن شط خراب
وازاز متكسر
كورنيش مش قلبي
واتمدد وشم في لوحه حديد
ـ ممنوع الحلو يزور المالح ـ

2 Comments:

Blogger saso said...

استني
ده هايل
عارف لما كلام-كلام صح- يجيلك في وقت صح،بقرالك وراسي تميل علي مزيكا جوانيه

شكرا علي المتعة دي

24 December 2008 at 17:35  
Blogger wessam kabil said...

حلوة قوي يايحيى

بالذات المقطع الأخير


والعنوان تحفة


حساها نقلة في شعرك

27 December 2008 at 15:00  

Post a Comment

<< Home