بنت م الصعيد

يمكن الوقت مش مناسب لحاجة زي دي دلوقتي

بس خلينا في نفسنا أحسن نتجنن م اللي جنبنا

ده يمكن المكان اللي اتصور فيه

فيلم مافيا

لأن تقريبا كل اللي نعرفه عن أسوان

عودوني ومافيا وبكار

ولما نحب نعمل مثقفين بنقول

عباس العقاد

بجد الناس دي أطيب ناس قابلتهم في حياتي

عمري ماقلت شعر

والناس مش عايزاني أنزل وأتوجرافات

ومش عارف أطلع أوضتي

وكأني تامر حسني

مع اني يمكن أغلى حاجة شايلها موبايل

ومش بتاعي كمان

وواحد لابس بدلة طلع يجري ورايا

في كواليس المسرح

فجريت منه كنت مفكره سمسم متنكر

لكنه حضني وقعد يبوس فيا

وكأني والدته بلغة الصعايدة انت مجرم

ففكرت برضه انه م الامن وهيقبض عليا

بعديها سابني ونزل ومكلمش حد غيري

فبالهواجس اللي معششة جوايا

قلت اه اخترني من وسطهم

الرسالة وصلت ياباشا

وطلع في الاخر

رئيس جامعة أسوان

والراجل اللي بيشد ستارة المسرح

ندالي وقاللي لولا اني واقف

كانت بنتي جت باستك

طبعا عملت زي الطماطماية المفعصة

وقاللي اكتبلها أي حاجة ذكرى

لأني اتخذت قرار اني هوقف مخي شوية

واحد طلع قال كلام الناس حبته

هي الناس عبيطة ولا هو اللي جامد

واذا كان جامد يستغل السلاح ده ولا يعينه

ولا ده مش مكانه ودي مش دنيته

سؤالات ملهاش نهاية في كل حتة

بس بجملة الغم اللي الناس فيه

قلت لوفي ايدي أبسطهم هعملها

عشان كده بعت البوست ده

يمكن ده رد على قصيدة بنوتة

صعيدية طلعت قالتها

لما كنا في قنا

في عرض الملتقى الثقافي العاشر

للجامعات العربية

كان كلام جميل بس قاسي شويتين

على الرجالة وتصرفاتهم بيقلدوا فاندام

وتطالب بعصر سي السيد

فطبعا الرجالة سخنت

وطالبت بالتار

يمكن الصعايدة قبل الغرب

واتلموا عندي في الاوضة

ولازم تجيب حقنا

فطبعا أنا مسالم

وبموت في المرأة رفضت

لكنهم ألحوا

فكانت دي يارب تعجبكم

الرأي محايد جدا

وعجب البنات قبل الشباب هناك

ياريت تقروها بالصعيدي

بلدي بلد العجايب

فيها القصص حكايات

آخرها في جنوب الوادي

حدوتة ست البنات

زعلانة من صنف الشنبات

بتقول عليهم ناس خواجات

لا عاجبها اللي ع يضرب جل

طب قبله بصوا في المرايات

ده لانير والتاني شادوف

وطقم حلل وغطاه مكشوف

لو مرة يتحضر كله

يطلعلي جني مهوش مصروف

ولا كان عاجبها الواد فاندام

مع انه يعني شكله تمام

هو اللي يهتم بروحه

دلوقتي ياخلق يبقى حرام

غلطان أنا وغلطي لابسني

وف كل حتة بينحسني

هعمل أنا فاندام على ايه

آسفين ياست سعاد حسني

عايزينه تاني سي السيد

موجود بزر يتجدد

بس الأكادة مفيش تعليم

ولا فسحة حلوة ونعيد

قالوا وقالنا في الامثال

رحنا وطفنا بميت موال

عارفين مقام ستي المهرة

لكنك ايه من غير خيال

جوايا نخوة وكرامة

لا بقولها رسم ولا دراما

لما بحب بحب بجد

مالزمش لحبيبي علامة

حبيبتي دي بريدها حكاية

جدعة وأصيلة بكفاية

لايجي يوم وتقول مليت

وتجيب لأحزاني مراية

لاتقوللي بابي ولا مامي

وفلانة دي جوزها حرامي

لو غبت يوم براة البيت

عارفة أصول طبعي الحامي

ماحناش ملايكة ولا شياطين

ولا انتو يعني الحور العين

ده حتى ورد الليل فيه شوك

وفكل خلقه في الصنفين

ياستي آنا

وتاج الروس

جوايا نبضك صوت محسوس

ونهايته مهما ألف وأحوس

هفضل بِِحُبك طير محبوس

صاحب الفكرة عازف العود من فريق المزيكا جامعة المنصورة

وشارك في الكلمات مع حلاوة

حــبــة جــد

كـنــت فاكر إني هقــدر يــوم أفـــوت

وإنـي هحفر يا مَا إسمـك في الحــواري

وع البـــيـــوت

بس لما شــلـت هــمــك

وارتويــت من نبع غمك

كــلبــشت فيا القــيود

انت .... يابني

يا للي حـابس نور عيـونـك

جوة غابـة

اِصحــــــــــى يابا

الحياة دي مش كآبة

مـــــش خـــرابـــــة

وسط شبكة عنكبوت

مش خرابة ..لأ خرابة

والغلابة عاشوا فيها

يآكلوا مش يمصوا دود

الغلابة ياما عاشوا ويا ماتوا ومنتهوش

لو هتيجي يوم تزورهم

تلقى ضحكة..ضحكة عايشة ع الوشوش

هي ........ ضحكة

بس بايشة ..... بين دموع

ناس غلابة لما تضحك

راح تجوع

لا يا صاحبي ...... ضحكة دافية

ضحكة طالعة م القلوب

ضحكة خلت تل هم كبير يدوب

ألا قوللي

حلم جيلك ليه تملي شمسه عاشقة للغروب

!!!!حلم جيلي

حلم نايم ...... ع الرصيف

كله أمله بت حلوة بين ايديها يعيش عفيف

هو فعلاً حال بلدنا حال يغم

بس برضه اللي عايز يبني نفسه

مش هيفضل ...... نص كم

بكرة تكبر

!!!بكرة أكبر

لسه نونو وشعري شايب

حتي ضحكي حلم خايب

لمّا هكبر... راح أسبها

وما أفكر يوم آجيلها

هاجي أقولك ...... اغتنيت

يا حبيبي كله واحد

واللي عمره ما داس في أرضه

يبقي ضيفها مهما يبني أو يضيف

ثم انك ناسي حاجة

ناسي انك .... راح تموت

وان اسمك بكرة يبعد م الوجود

بكرة تعرف

ان عيشتك .... زي موتك

صرختين ملهمش صوت

كنت بحلم أبقى فارس

وأبقى ليكي يا مّا حارس

بس ضعفك

شل ايدي ... شل عقلي فاعذريني

شوف ........ يا صاحبي

دي بلدنا ........ واحنا ليها

بكرة نكبر ........ نحتويها

لو نسيبها ......... مين يجيها


written by halawa & hameed

الـكـنـز

ياليل م الحب صاحي

ومن الشقى نعسان

على كل طوبة ندى

وشذى وأمل انسان

من الضلام في الضي

ومن العطش في الري

من ألف حي وحي

من ألف عام وأنا عايش

في الزمان الجاي

كلمتين جامدين سمعتهم من وجيه عزيز هزووووني

وافتكرت ساعة أما كان بيحكي مع منى الشاذلي عن حفلة

كان طالعها والناس شتمته فقعد يلحن الشتيمة

وكمل غنى والناس سمعته ونجاوبت معاه

وأكيد هما دول أكتر ناس اتكلمت عنه وعملوله دعاية

قرار أخده في لحظة كانت انهيار

ولو نزل ومغناش هيفضل مهزوم في نظر نفسه

واجه خوفه بطريقة بشوف الدنيا بتحطنا فيها علطوووووول

اتنين واقفين قصاد بعض كاوبوي أمريكاني

كل واحد في ايده مسدس فيه طلقة واحدة

النجاح والفشل..ولازم قرار...وأين كان

صابت ولا خابت أوحتى لوخدت جرح صغير

فأنت اللي شايل الليلة

وده وضع مفروض علينا رسماه الحياة

ممكن نهرب منه..بس هنبقى للأسف خارج الخدمة

وممكن نهرب ليه..وأكيد في دقيقة حتى الخط هيجمع

احنا فعلا بندور على بكرة في الزمان الجاااااي

أنا يمكن شايف له ملامح ..الحمد لله ..وصلنالها

وده مش تفاؤل..اوعوا تفهموني صح..دي مش أخلاقي

وصلنا لمعطيات بكرة يالجروب ده..بالناس دي ..بوش مصر الحقيقي

مش بتاعة تامر وعمرو وشريف صبري

صورة الحارة المفتحة ابوابها على بعض بكل قيمها

ومبادئها وأخلاقها

أرابيسك..بيتكمل حبة حبة

ساعات أما بزعل بخش أشوف البلوجرز كاتبين ايه

مين بعت

لازم أروح... ده معاد بوست فلان...ياترى مشواره تم ولا

صحي م النوم الصبح بالليل؟॥عملت ثورة؟

النحلة قرصتها؟

راحت سيتي ستارز؟॥قلمه طفح؟

جالها عريس جديد..كتب قصيدة؟

عيان...بتولد...فرحه فين؟॥

لسه زعلانه.؟..اشتغل ولا لسه

نجحت..عمل ايه في الامتحان..دراعها مكسور؟

قابلت محمود سعد؟

حتى لما بتتهز ثقة الواحد في نفسه

بيرجع تاني يقول لنفسه...أنا أعرف الناس دي

يقلب صور..يقلب بوستات...يشوف فيديوهات

أنا صاحب عاشق وسكايار ومستكنيص واللهو الخفي

وعبد الحي وميدو ومؤمن وخفة دم

واخواتي ثورة وكلماتي وديو برايد وترو ثينج

و وخوخة وسوسو وماهي وزوز وروفي ورومي

وبطوطة وجميلة وباقي الكاست

هزعل ليه خايف من ايه

حتى الناس اللي ماشفناهمش سمراء النيل ومحض روح

وبرااااااااااااايد

في معنى جديد بيتولد .....جوااااااااانا

ومش هزعل لو محققناش اللي عايزينه

وكان حتى الكنز في الرحلة...أعتقد يكفي

صابر راضي شاكر قانع

بايس ايدي وش وضهر

في كل حارة ولد عترة وصبية حنان

وكلنا جيرة وعشرة وأهل وخلان

أصل الحكاية حكايتنا ابني الانسان

لا تـحـسـد

ايه لأ بجد كفاية معدش هقرا حاجة معدش هخش بلوجات

أنا كنت فرحان ان السلك المقطوع في وشي

رجعت له الحرارة والخط ابتدى يجمع

ورجعت أذاكر فقلت أدلع نفسي وأشوف الشباب

يا فرحة ماتمت رفسها الحمار وغار

جوة وبرة فرشتلك وانت مايل ايه يعدلك

يا شماتة أبلة طاظا فيا

بدأت بمحض الروح بعدين عاشق الروح

وختمت بالمايسترو ..ثورة

انا بقيت مستني الدفنة الساعة كام

كل ده عشان ذاكرت يوم

معدتش هعملها تاني

طب ارجعوا طبيعين..حقكوا عليا ..أنا آسف جاهل ماعلمش

كنت رايح الجامعة لأول مرة من زمان بشوش متفائل

وكأني مزة مصر الاولى وعدى عليا سكايار

اليوم مش مظبوط

بقالنا خمس سنين مرحناش الجامعة مع بعض..قلت مش مهم عديها

ولأول مرة يلتقي عاشقي المواصلات سوى وفين في الطوربيد العالمي

الاصطباحة جنبنا واحد شايل....كوكو واوا على ايده

ايه المشكلة بس كانت بتبصلنا شظرا حاسة اللي احنا هنعمله في البشر

فرخة ايه عسل بور تابل يعني مش قضية

ومحكيلكوش على عناق الشعب المصري في الاتوبيس

حب ايه بقى كل واحد كرشه في بق اخوة

حاجة بسيطة كان لسه فيه لوحة

كنا بنتكلم عليها في الطريق من كذه يوم شكلها حلو مكتوب عليها

كفر الاصالة وكفر العرب ترحبا بكم

فقعدنا نتناقش هما بلدين ولا بلد واحدة

شئ لا يصدقه عقل

تن تتتتتتتتتتتتتتتتتن

نلاقي عربية نقل ايه لووووووز بمقطورتين

واخداها بالحضن زي فاتن حمامة وعمر الشريف

بسيطة كل شئ ليه عمر افتراضي

وسبب علمي ياحورية

ودخل علينا راجل فلة

انت يا استاذ اللي هناك اتبرع لبناء المسجد

بقاله ست سنين متعلق

اعمل حاجة قبل وفاتك جايلك يوم حساب

والله انا مبحبش اتريق ع الحاجات دي

بس هو اضطرني حتى الشيخ اللي جنبنا خاف منه

وكان قاعد قدامنا ولد صغير نايم على كتف ابوه

ناموس الدنيا باصم على وشه

وكأنه طالع من السجل المدني

ونص مواطني مصر ماسحين في وشه

ولا يكون توقيعات ناموس حركة كفاية

وهو نازل اتخبطت في سقف الأتوبيس

وقعد يعيط وكانت فضيحة

وجت سيرة البلوج اللي قلنا عليه حلو تاني يوم اتمسح

لأ أووووووووفر

فجأة الطريق اتقفل ...بدأنا نوعى احنا فين أأأأأأأأأن

الجامعة ...احنا في طلخا ليه؟؟؟؟

احنا راكيبن الجامعة

الاتوبيس خرم....وبالتالي اتخرم

الحداقة المصرية الدفينة والجشع

ووصنا والحمد لله وقررت اني اسيب سكايار

لأن معدش ينفع بجد

حفاظا على جنس البشر

مدووووووورة ومقووووورة

صوت الفيران

بقالي فترة طويلة ما بنامش كويس وكل أما أدخل السرير أنام بعدها بست ساعات

أقعدت أفكر في حاجات غريبة جدا ياواد ياحلاوة انت مين؟ وانت ليه ؟ وانت ازاي؟

وألف الأوضة خرم خرم .. أبص للشعر اللي ع الحيطان وافتكر الناس اللي كاتبة توقيعات..وأضحك

يقابلني تمساح خشب كان أبويا جايبه محطوط فوق الدولاب

يحسسني ان احنا في حتة عريقة أو أسرة مثقفة من بتوع الأتيليه والفن التجريدي

اقلب عينيا تاني على الكرسي الوثير المتمركز في الأوضة المتر في متر... ماحنا أسرة حاكمة..ألاقي كيس الشرابات

هواية أمي.... كل أسبوع تيجي تحدفه في خلقتي شراباتك آهي كلها مغسولة

عشان ميقلكش حجة لقيته مليان شرابات ..أصلي مخرجتش من زمان

أسيب الشرابات ..تيجي عيني ع الشباك

وسلك الواصلة اللي بيعافر يخش من زخنوق الخشب مع الحيطة

كمواطن مصري في محشور في المواصلات.....

السلك عامل فرق في قفلة الشباك مدخل سرسوب هوا لوز في التلج

بيصفر ساعات بيحسسني اني جايلي شفرة م العالم الآخر

ولا مصر تكون غالية عليا وده السيد نديم

وأنا حلاوة سامحون

وأوصل للتليفزيون ..وأحاسب نفسي البتاع ده خد قد ايه من عمري...أنا واللي زيي

بيقدم ايه يخلينا مستغنيين عن الناس.... وممكن مانعملش اي حاجة بسببه

أوصل بطرف عيني لهدومي اللي متعلقة ع الشماعة المكسورة

اللي بحاول أحط عليها هدوم كتير عشان تداري شرخ الحيطة اللي وراها

وسبوت النور الأخضر اللي هو أصلا عادي بس لما كنا بندهن البيت غطسته في شوية بوية خضرا بقى روش

بس مع السخونية بدأ يرجع للونه والأخضر ابتدى ينزاح عامل تشويش رؤية واضاءة مالوش حل

عشان كده بفتحه وأنا مش عايز أنام

وأوصل للوحش الصامت كرت متعلق(أي دي) في شريطة حمرا نازل مدلدل م السقف من العليقة اللي مفروض

تبقى للنجف كل أما اعدل الكرت أو ال آي دي يدور وشه..ويديني قفاه الأبيض

وسرحت شوية في حلم واحد صاحبي

عدى عليا من يومين كان بيشتكيلي انه مابينامش فقلت له ايه السبب

قاللي كل أما أنام ألاقي كابوس فظيع ....واحد بيضربني بالرصاص...أروح شارع يخش ورايا

كل أما أنام يحصل كده لدرجة انه بقاله اسبوع مانامش وكل أما يخش بيت يطردوه

محدش سمحله يستخبى عنده..... غير الناس اللي ودالهم شنط خير في رمضان

قعدت أحاول أفسر شوية بس مش لاقي حل ومش وظيفتي اني ألاقي حل

الموضوع شاغلني

هو ماقلش لحد غيري طيب ربنا يمكن عايز يوصلي رسالة من خلاله

طب أنا في ايدي ايه أعمله في أي اتجاه وأنا مقصر

سؤالات.....سؤالات........ لا تنام

قطع الصمت ده صوت لذيذ بالنسبة لي

مقرف لناس كتير..

صوت زقزقة الفيران

أيوة فيران

حكمن أوضتي في آخر البيت صومعة كده

حتى لو أمريكا ضربت مصر مش هيحصلها حاجة

يحدها من كل الاتجاهات ترسانة من المباني

فبسمع صوت الفيران وهي بتجري بين الحيطان المجاورة عسل قوي صوصو صو صو

وكأنها بتكلم بعض اللي واقف هناك عامل زحمة يعدي

والطويل قدام والقصير ورة

لو سمحت

فأر ملاكي جيزة اللي راكن صف تاني يطلع

ويك ويك ويك

فقلت أفتح شباك المسقط أبص كده وحددت مكان الصوت من تكراره

لقيت سرب ماشي....نظامي جدا على حيطة الجيران

فوقفت أتفرج مشنكل الشباك...عشان مايهربوش بسرعة

فواحد منهم شافني....وقف بصلي بصيتله.....بعت لي نظرة بعت له

فكرت آخد رقم موبايله

بس حسيت انه ممكن يكون............. فارة

مش فار.......وتبقى مصيبة ....... ويهدر دمي

وألاقي بيتنا شايلاه الفيران وماشية

رايحين يرموه في الترعة

فقلت أقدم السبت...... رميتله أو رميتلها حتة عيش ناشفة

من سندوتش حلاوة بقاله يومين في الأوضة

فطلع أو طلعت طفسة نصيب ....... ال...على أشكالها تقع

وفعلا مكدبش خبر وانسجم معايا

حدفت له واحدة تانية نزل وراها

وهب ........تن تننننننننننننننننننننننننن

وقع في مسقط الجيران

فــــأر فــــقــر فـــأر