HALAWA: بص وطل

إيـديا في جيـوبي و قلبـي طـرب
سـارح فـي غربـة بس مـش مغـتـرب
وحـدي لكـن ونسـان ماشـي كـده
ببـتـعـد معرفـش أو بقـتـرب ؟
عجبي !!!

غمست سنك في السواد يا قلـــــم
عشان ما تكتب شعر يقطر ألــــم
مالك جرالك إيه يا مجنون ... و ليـــــه
رسمت ورده وبيت و قلب و علـــــم
عجبي !!!

إقلع غماك يا تور وارفض تلف
إكسر تروس الساقية و اشتم وتف
قال : بس خطوة كمان وخطوة كمان
يا اوصل نهاية السكة يا البير تجف
عجبي !!!

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد زي الصداع
عجبي !!!!

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا وحي بيصير تراب
الأصل هو الموت و الا الحياه ؟
عجبي !!!

ضريح رخام فيه السعيد اندفن
و حفره فيها الشريد من غير كفن
مريت عليهم قلت يا للعجب
لاتنين ريحتهم لها نفس العفن
عجبي !!!

ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!

و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

يا باب يا مقفول إمتي الدخول
صبرت ياما و اللي يصبر ينول
دقيت سنين و الرد يرجع لي : مين ؟
لو كنت عارف مين أنا كنت أقول
عجبي !!!

أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
عجبي !!

سهير ليالي و ياما لفيت و طفت
و ف ليه راجع في الضلام قمت شفت
الخوف كأنه كلب سد الطريق
و كنت عاوز أقتله بس خفت
عجبي !!

كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!

عجبتني كلمة من كلام الورق
النور شرق من بين حروفها و برق
حبيت أشيلها ف قلبي قالت حرام
ده أنا كل قلب دخلت فيه اتحرق
عجبي !!!

رقبه قزازة و قلبي فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي !!!!

ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!

ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لو افترقنا نموت متحسرين
عجبي !!!

نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!

علي رجلي دم نظرت له ما احتملت
علي إيدي دم سألت ليه ؟ لم وصلت
علي كتفي دم و حتي علي رأسي دم
أنا كلي دم قتلت ؟ والا اتقتلت
عجبي !!

انا كل يوم أسمع فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!

ينبوع و في الحواديت أنا سمعت عنه
إنه عجيب و ف وسط لهاليب لكنه
شقيت كما الفرسان طريقي لقيت
حتي الخنازير و الكلاب شربوا منه
عجبي !!!!

يا قرص شمس ما لهش قبة سما
يا ورد من غير أرض شب و نما
يا أي معني جميل سمعنا عليه
الخلق ليه عايشين حياه مؤلمة
عجبي !!!

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني و إيه العمل
عجبي !!!

أعرف عيون هي الجمال و الحسن
و اعرف عيون تاخد القلوب بالحضن
و عيون مخيفة و قاسية وعيون كتير
وباحس فيهم كلهم بالحزن
عجبي !!

إيش تطلبي يا نفس فوق كل ده
حظك بيضحك و انتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!

في يوم صحيت شاعر براحة و صفا
الهم زال و الحزن راح و اختفي
خدني العجب و سألت روحي سؤال
أنا مت ؟ و لا وصلت للفلسفة
عجبي !!!

الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!

علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي !!

إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك
عجبي !!

نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير
عجبي !!!

يا نجم .. نورك ليه كده بيرتجف ؟
هو انت قنديل زيت ؟ أو تختلف
أنا نجم عالي .. بس عالي قوي
و كل ما انظر تحت اخاف انحدف
عجبي !!!!

السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!

وقفت بين شطين علي قنطــرة
الكدب فين و الصدق فيـــن يا تري
محتار ح اموت .. الحوت خرج لي وقالي
هو الكلام يتقـاس بالمســطرة
عجبي !!!

سرداب في مستشفي الولاده طويل
صرخات عذاب ورا كل باب وعويل
.. وفي الطــــريق متزوقين البنات
متزوقـــــــين للحب و المواويل
عجبي !!

الدنيا أوضة كـبيره للانتظار
فيها ابن أدم زيه زي الحـمار
الهم واحد .. و الملل مشــترك
و مفيش حمار بيحاول الانتـحار
عجبي !!

أيوب رماه البين بكل العــلل
سبع سنين مرضان وعنده شلل
الصـبر طيب .. صبر أيوب شفاه
بس الأكـــاده مات بفعل الملل
عجبي !!!

نسمة ربيع لكن بتكوي الوشــوش
طيور جميلة بس من غير عشـوش
قلوب بتخفق إنما وحـــدها
هي الحياه كده .. كلها في الفاشوش
عجبي !!!!

يا طير يا عالي في السـما طظ فيك
ما تفتكرشي ربنا مصطــفيك
برضـــك بتاكل دود و للطين تعًًًًودً
تمــص فيه يا حلو .. و يمص فيك
عجبي !!!

كروان جريح مضروب شعاع م القمر
سقط من السموات فؤاده انكســـــر
جريت عليه قطه علشان تبلعــــه
أتاريه خيال شعراء و مالهـوش أثر
عجبي !!!

ياللي نصحت الناس بشــرب النبيت
مع بنت حلوه وعود وضحك وحديت
مش كنت تنصحهم منين يكسـبوا
تمن ده كله ؟ ... و الا يمكن نســيت
عجبي !!

ما حد في الدنيا واخد جزاتـــه
و لا حـد بيفكر في غير لذاذاته
ما تعرفيش يا حبيبتي أنا و انتي مين؟
إنتي عروس النيل و أنا النيل بذاته
عجبي !!

رقاصه خرسا و رقصه من غير نغــم
دنيا يا مين يصالحها قبل النـــــدم
ساعتين تهز بوجههـــــــا يعنـي
يترجرجوا نهديها يعني نعــــــــــم
عجبي !!!

إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان
عجبي !!!!

من بين شقوق الشيش و شقشقت لك
مع شهقة العصافير و زقزقــــت لك
نهار جديد انا . . قوم نشوف نعــمليه
انا قلت يا ح تقتلني .. يا ح اقـــــتلك
عجبي !!!

جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــئ
مع إن – عجبي – كل شئ موجود
عجبي !!!

جالك اوان وعرفت مشي الجنايــــــز
كيف شفتها يا عبد رب اللذايـــــــــذ
قال : شفت شيل بالحيل فقير أو اميـــر
كما شالوا في الخمامير فواضي القزايز
عجبي !!

أنا كنت شئ و صبحت شئ ثم شــئ
شوف ربنا .. قادرعلي كل شـــــــئ
هز الشجر شواشيه ووشوشني قال :
لابد ما يموت شئ عشان يحيا شئ
عجبي !!

يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!!

كيف شفت قلبي و النبي يا طبيــــــــب
همد و مات و الا سامع له دبيـــــــب
قاللي لقيته مختنق بالدمـــــوع
و ما لوش دوا غير لمسه من إيد حبيب
عجبي !!!!

تسلم يا غصن الخوخ يا عود الحطـــــــــب
بييجي الربيع .. تطلـــــــــــع زهورك عجب
و انا ليه بيمضــــي ربيع وييجي ربيع
و لسه برضك قلـــــــبي حتة خشب
عجبي !!!

قلبي عليل يا ناس و في الكاس دواه
مديت له إيدي شربت م اللي حــــواه
جنبي الشمال خف .. اليمين اتــــوجع
و إيه يداوي الكبد م اللي كـــــــــــواه
عجبي!!

دي مزكرات و كتبتها من ســـــــــنين
في نوتة زرقا لون بحور الحنيــــــــــــن
عترت فيها .. رميتها في المهمـــــــلات
وقلت صحيح أما صحيح كلام مخبولين
عجبي !!

النهد زي الفهد نط اندلع
قلبي انهبش بين الضلوع و انخلع
ياللي نهيت البنت عن فعلها
قول للطبيعة كمان تبطل دلع
عجبي !!!

صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!!

كرباج سعاده وقلبي منه اجلد
رمح كأنه حصان و لف البلد
و رجع لي نصل الليل و سألني .. ليه
خجلان تقول انك سعيد يا ولد
عجبي !!!

حدوته عن جعران و عن خنفســــه
اتقابلوا حوا بعض ساعة مســـــا
و لا قال لهم حد اختشوا عيب حـرام
و لا حد قال دي علاقة متدنســــــة
عجبي !!!!

العشب طاطا للنسايم و نـــــخ
أخضر طري مالهش في الحســــن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فـــــخ
عجبي !!!

غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!

ظهر المسيح الحي علي سفح ربـــوة
و نزل بهالة الضي و قعد في قهـــوة
بصوا .. تعالوا .. قالوا خليه في حالــه
الناس في حالهم يا بني .. مالهمش دعوة
عجبي !!!

HALAWA

Saturday, 13 June 2009

بص وطل

3 Comments:

About Me

Previous Posts

IN DOOR

EDAFA TEAM

OUT DOOR

Teens ...... :-)

COOK DOOR :-)

رباعيات الأستاذ