Saturday 15 March 2008

فـتـحي وهــدى

كان نفسي
أكون لـِك كل حاجة
وأبقى في عنيكي
أحلى حاجة
مـا هـيّـا حاجة
عاملة بي حاجة

خلتني حاجة ....وكنت حاجة

كان نفسي أكون
برواز لصورتك
محطوط على جلدة كتاب

وأما تيجي الصبح خارجة
أبقى أنا
مراية الدولاب
!!!!

تضحـكي لي
تـغـمزيلي

تفهـمـي عـقـدة جبـيني
فــ تـطـولي حـبـّة الحـجـاب

وانتي ماشية
تبقى عيني
حارسة روحك م العذاب
وأتـبـدر حـبـّة رقــاوي
تداوي جرح الاكـتـئاب
عارفة الصداع
حتى برشامة الصداع !!!!
لو يوم تحسي بالضياع
أبقى بـُوحك..وأبقى نـوحك
وأبقى لزقـاية لجروحك
تحزني
أملاكي فرحة
وأبقى قـفـلة نن عـيـنـك
نـص فـتـحـة
ويا غمازات خدودك
أبقى ضحكة
..وانتي سارحة

وأبقى مفتاحك لذاتك
ويا تـنهـيدة سـكـاتك
حتى سجـادة صلاتـك
يكفيني أطول بيكي الأمان

وأبقى بركانك وغضبك
وأبقى سـدك وأبقى مـدك
وأبقى مـركب غـاوية تـغـرق
لـجـل تعـبـر بـحـر ودك

وأبقى نورك وأبقى نارك
وأبقى ساعة الكسرة دارك
وان تهت يوم وضاع مدراك
تـهـديـني .. تدريجة سمارك

خايف أكون فاتتني حاجة
ولا كنت ليكي فيها حاجة
بس اللي عارفو في كل حاجة
إني بيكي صبحت حاجة
...........................................
أعتذر عن تأخري كان عندي
ظروف عائلية
وشكرا لكل اللي سأل عليا
دي هدية بسيطة
واعتذار لأني ملحقتش أعملهم أغنية
سي الضاكتور فتحي
صديقنا الغالي
والآنسة هدى بنت الحاج كامل
أخت الواد الضاكتور كيمو
البيت اللي آوينا من الشوارع
أكل إيه وماتشات وسينما
وأشكرها تاني لأنها وافقت عليه
ولمته من الشوارع رغم كل اللي تعرفه عن شلتنا
الصامتة الهادئة المبجلة
بجد كان من أسعد أيام حياتي
ويارب يديم عليكو الأفراح
ويحميكو من عيون الناس
شكر خاص لفرقة مراجيح جديلة الاستعراضية
عاصي و حسن و كيمو ومحمد يحي
على إحياء الحفل مجانا
ههههههههه

36 Comments:

Blogger أحمد سلامــة said...

يا سلام يا عم يحيى
كده تبقى المدونة اسم على مسمى
اخر حلاوة

اسمحلى اقولك كلمة مقلتهاش في شعرك قبل كده
وهي
دمه زي العسل
والله العظيم

عارف انت لما تقرى حاجة كده تفتحنفسك للدنيا الدلعة المايعه دي
تفكك من الوزن والقافشة والوش ده
ومتقراش غير عشان تستمتع وتحس
ربنا يكرمك يا صديقي

وهي مش حاجة غريبة ولا حاجة زي ما انت قلتلي
هي روحك كده وهتفضل كده

15 March 2008 at 03:42  
Anonymous Anonymous said...

ايه الفضايح دي يا ملك.مصر كلها
عرفت اننا بنحيي افراح.وببلاش.
متشكرين يا ملك ربنا يخليك لينا
ونفرح بيك بقي وتطاوعني زي صاحبك
(ادعيله ربنا يفك دقيته)
بس بجد حلوه اوى اوى اوى اوى واهي
هتنفع ان شاء الله قريب مع ناس تانيه
ربنا يكرمهم يارب.
شكرا يا ملك تاني علي الحلاوه دي
واكيد انت عارف انك اخوهم هما الاتنين
و احد اكبر مؤسسي فرقه مراجيح جديله
الاستعراضيه (قسم تصوير).ههههههههه

15 March 2008 at 04:07  
Blogger sakayar said...

لولولولولولوي
الواد فتحي ده واد نضيف اوي ... انا من يوم ماشفته قلت كده
والبنت بنتنا والواد برضه بنتنا...يووووه اقصد ابننا
مبروك يا عياااااااااال
ايوة كده ادوني في اللذيذ
بحب القصيدة دي جدنننننن
ربنا يخليكم لبعض يا عيال
بارك الله لكما وعليكما وجمع بينكما في خير
مبروك يا أبيه حلاوة وعقبال أهلك
يحرق يولع

15 March 2008 at 12:56  
Blogger ono said...

أبقي بركانك وغضبك
وابقي نورك وابقي نارك
وابقي ساعة الكسر دارك
فيه كده ف الدنيا طيب ياريت
دأنا سعتها أكون ملك ايديه
بجد يادكتور والله تجننننننننن
وعقبالك بأه يارب عن قررررررررريب جدآ
تحياتي
"وتعالو زروني"

15 March 2008 at 16:00  
Blogger روح شرقيه said...

مبروك
الف مبروك
عقبالك يا سيدى ونفرح منك
بس بقولك ايه ابقى اعزمنا لحسن انا وحشتنى اوى افراحنا
بارك لهم ويا رب يكملهم بالخير وتكون ليهم ذريه كلها خير

15 March 2008 at 19:04  
Anonymous Anonymous said...

ايه ياباشا الحلاوة دى يارب يخليك لنا ونفرح فيك يوووووه قصدى نفرح بيك وتبقى عضو فى المغفلين ونجيبلك فرقة المراجيح تانى وابقى انا القائد بتاعهم المرة وتجرب بقى ماهو اللى ايدو فى الميه مش زى اللى ايده فى النار ونشوف وشك احمر

15 March 2008 at 20:18  
Anonymous Anonymous said...

وأبقى بركانك وغضبك
وأبقى سـدك وأبقى مـدك
وأبقى مـركب غـاوية تـغـرق
لـجـل تعـبـر بـحـر ودك


حلو قوى يا حلاوة بس دى اكتر حتة عجبانى..
تحس ان فيها قوة و ضعف فى نفس الوقت

keep it up its wonderful

urs,atr el nada

15 March 2008 at 22:05  
Blogger MestKA said...

مبروك يا دوك وعقبالك وعقبال باقي الشله المبجله
بجد كلاك جميل ومميز كالعاده
:)

16 March 2008 at 23:50  
Blogger WhItE HeArT said...

حلو اوي يايحيى بجد

ألأف مبروووك للعروسين

ومتغبش تاني ياعم انته

17 March 2008 at 00:50  
Blogger Halawa said...

أحمد بك سلامة

هلا يا غالي ازيك
ربنا يخليك يا ملك

انت اللي عسل
احنا مورناش غير المسخرة
هههههههههه
وهي كمان بتحبنا
على فكرة كنت هسمي البلوج
حلاوة روووووووووح
بس مش عارف ايه اللي حصل

يلا خير والحمد لله
ان الاحساس وصلك
ساعات تحب تكتب حاجة دلع كده
أو ده اللي مسيطر عليا دلوقتي

ربنا يخليك تحياتي

17 March 2008 at 07:49  
Blogger Halawa said...

kimooooooooooo

دبستك يا معلم في بلوجاية
http://onelove-dm2.blogspot.com/
شوفوها يا ناااااااااااس
يا بني الفضايح دي جزء من حياتنا
خخخخخخخخخخخخخ
ده المشروع بتاعنا
دج وفرقة استعراضية
ونسميها جديلة تفاؤلا بالمكان
هههههههههه
ربنا يوفقه
احنا لازم نحافظ على عاصم
لأنه شكله اتبهدل مننا قوي
فكك مني انا دلوقتي
لا شكر على واجب ياريس
دول أولادي بصوت السادات
شوف لنا فرح الأسبوع ده
مش هينفع نبقى عواطلية كدهههههههه
عقبالككككككككك

17 March 2008 at 07:52  
Blogger Halawa said...

سكايارررررر

لووووووووووولللللي
هو فعلا بيستحمى كتير
لدرجة انه أبيض اهو
ههههههه
لا بجد انسان جميل
كلهم اولادنا
ادعي لأخيك عاصم انه الآن ......
خخخخخخخخخخخخ
عقبالك ياريس
كنت عايز أحطها عندك كمان بس قلت
بوست بطوطة أولى يقعد حبتين

سلم عليها كتيرررررررر
وعلى أم ليلي

17 March 2008 at 07:54  
Blogger Halawa said...

أونوووووووو

باشااااااااا ازيك
واللهي كدابة
هتطلعي عين أمه برضه
ده انتي مفترية
هههههههههههه

ربنا يخليكي يا منمن
وعقبالك
أنا مش فاضي للحاجات دي
انا هتجوز واحدة م الحزب الوطني
أبوها لوا
ههههههههههههههه

17 March 2008 at 07:55  
Blogger Halawa said...

روح شرقية

ربنا يبارك فيكي
ان شاء الله
لو حصل لووووووو
هعزمك لا تقلقي

وعقبالك وشرفتينا جدن
وشكرا لاهتمامك

17 March 2008 at 07:56  
Blogger Halawa said...

فتحي باشا
يا خويا لازمتها ايه md
فكرتها مدام فتحي
هههههههههه
بلاش شغل المثقفين ده علينا
بجد ياريس انا فرحان قوي
ويارب يتمم عليكو بخير

بجد حتى الناس اللي متعرفكوش
مبسوطة بالشكل الدويتو لذيذ
ربنا يحميكووووووووووووا

ياترى هتفضل عايش لما تشوفني
خخخخخخخخخخخخخخ
قول يارب أكيد هنبقى سوى طبعاااااا

17 March 2008 at 07:58  
Blogger Halawa said...

قطر الموت
قصدي قطر الندى
ههههههههههههه

ازيك يارب تكوني بخير
فينك
ايه رأيك
انتي كنتي قريتيها قبل ماتكمل
ع الموبايل

كويس انها عجبتك
آخر تلات أجزاء أنا بحبهم قوي
عقبال ماكتبلك وأعملك كليب

ياااااااااااااارب

17 March 2008 at 08:00  
Blogger Halawa said...

مستكةةةةةةة

هلا هلا بالناس الناجحة
ربنا يبارك فيكي وعقبالك

اعزمينا لا تقلقي
هجيب الفرقة كلها
بس هتدفعي فلوس
ههههههههههههههه

17 March 2008 at 08:01  
Blogger Halawa said...

وايت هاااااااااارت

ازيك يا واد
عامل ايه؟
كويس ان كلامي عجبك يا خويا
متقدرش أصلا
عقبالك ياجميل

دوس امتحاناتك قربت
لا تقلق انا بخير وموجوووووووووود

17 March 2008 at 08:02  
Blogger الحلم العربي said...

الف مبرووووووووووك
اجمل حاجة انك تحس انك فرحان لللناس بجد ....مش كل الاناس بتعرف تعمل كده و مش كل الناس بتستاهل ده
ربنا يبارك لهما يارب و عقبالك يا افندم

اما بقى عن موهبتك فانت عارف رأيي من زمان ....
تحياتي

19 March 2008 at 11:43  
Blogger الخيط الرفيع said...

كان نفسي أكون
برواز لصورتك
محطوط على جلدة كتاب
وأبقى مـركب غـاوية تـغـرق
لـجـل تعـبـر بـحـر ودك

وأما تيجي الصبح خارجة
أبقى أنا
مراية الدولاب
تضحـكي لي
تـغـمزيلي
تفهـمـي عـقـدة جبـيني
فــ تـطـولي حـبـّة حـجـاب


وانتي ماشية
تبقى عيني
حارسة روحك م العذاب
وأتـبـدر حـبـّة رقــاوي
تداوي جرح الاكـتـئاب
عارفة الصداع
حتى برشامة الصداع !!!!
لو يوم تحسي بالضياع

أبقى بـُوحك..وأبقى نـوحك
وأبقى لزقـاية لجروحك
تحزني
أملاكي فرحة
وأبقى قـفـلة نن عـيـنـك
نـص فـتـحـة
ويا غمازات خدودك
أبقى ضحكة ..وانتي سارحة

وأبقى مفتاحك لذاتك
ويا تـنهـيدة سـكـاتك
حتى سجـادة صلاتـك
يكفيني أطول بيكي الأمان
ما نتي قـدَري من زمان

وأبقى بركانك وغضبك
وأبقى سـدك وأبقى مـدك
وأبقى مـركب غـاوية تـغـرق
لـجـل تعـبـر بـحـر ودك

وأبقى نورك وأبقى نارك
وأبقى ساعة الكسرة دارك
وان تهت يوم وضاع مدراك
تـهـديـني .. تدريجة سمارك

كان نفسي
أكون لـِك كل حاجة
وأبقى في عنيكي
أحلى حاجة
مـا هـيّـا حاجة
عاملة بي حاجة
خلتني حاجة ....وكنت حاجة




خايف أكون فاتتني حاجة
ولا كنت ليكي فيها حاجة
بس اللي عارفو في كل حاجة
إني بيكي صبحت حاجة

لو تسمح انا شيفا ترتيبها كدا احلي
_________
عارفة الصداع
حتى برشامة الصداع !!!!
لو يوم تحسي بالضياع

الحته دي في طعامة رابع ورا في الميكروباس

.......
وأبقى مـركب غـاوية تـغـرق
لـجـل تعـبـر بـحـر ودك
........التعبير دا حلو

وأما تيجي الصبح خارجة
أبقى أنا
مراية الدولاب !!!!
تضحـكي لي
تـغـمزيلي
تفهـمـي عـقـدة جبـيني
فــ تـطـولي حـبـّة حـجـاب

الحته دي بقي فيها جديد بدأت ترسم بالكلام مشاهد
والحلو انها بسيطه ومعبره وبتخلينا فعلا كأننا شيفين
بس مش واخد بال سيادتك من حاجة هي بتلبس وخارجة وحضرتك قاعد ليه ان شاء الله في حاجة ان شاء الله بصوت هنيدي اللي بتكرهه
هههههههههههههههه
كان المسرحيه اسمها رايحة عن بالي
ما علينا

في تعابير كتير عجبتني
روح لحد يكتشفك بقي وخلصنا
بدور علي سلبيات اقولهالك علشان تستفيد مش يكون تشكيييييرات وخلاص
بس حقيقي مش شيفا حاجة
يمكن بس انك بقيت تركز علي النوع دا من المواضيع جميل بس تنوع
وحشني حاجة زمان
الامل والعمل جو التنمية بالايمان
انا علي فكرة لسه واخدة علي خاطري منك قوي
ولا تقولي نشر غسيل ولاتنشيف
يا ابن عاق

19 March 2008 at 13:33  
Blogger Camellia Hussein said...

ايه الجمال ده كله
حلوة اوي القصيدة
ومبروك لفتحي وهدي

20 March 2008 at 03:46  
Blogger ♥ BaToOoT ♥ said...

بارك الله لهما وبارك عليهاوجمع بينها فى خير
يااااااااااارب هما
وكل اللى ويهم
ويسعدك ياراب ياحلالالالالالاوه
واشوفك يوم فرحك كده والفرحه طله من عيونك
بس من غير نظاره
ههههههههههههههه
شوكرن على اللى بالى بالك

والقول المأثور
هههههههههههههه
اهو اى خدمه مضبطكو وانت بتكتب القصيده
مبروك هدىىىىىىىىى وفتحححححححى
حلوه اوى
كلها تجنن بجد
مش غريب عليك يعنى
عارف وربنا ببقى خايف كتاباتك تتسرق زى ما حصل مع اخف دم
ومش تقعد تقول سرقه ايه ومين ده اللى يسرقك وكلام من ده
انت عارف انك جامد بس بتتواضع
عاااااااااا

ربنا يحيمك ويسعدك ويوفقك يااااااارب
ونفرح بيك قريب بس ممكن تبقى تستنى لما كيكو وانا نرجع؟؟

خايف أكون فاتتني حاجة
ولا كنت ليكي فيها حاجة
بس اللي عارفو في كل حاجة
إني بيكي صبحت حاجة

...
جااااااامده مووووووووت
يارب يوفقك اووووى ويكرمك

شوكرن كتيييييييييييير على حااجت كتيييييير

21 March 2008 at 21:42  
Blogger Halawa said...

الحلم العربييييييييي

هلا أختي الغالية
ازيك اخبااااااارك
شفتي الويلاد
عملوها الأبطاااااااااال
عملوها الوحووووووووووش

الحمد لله الناس دي هدية من ربنا
ويستاهلوووووووووووا فعلاااااااا
عقبال سعادتك
وأكيد انا جااااااااي
وهقعد آكل للصبح لحد ماتطرديني
هههههههههههههه

تسلمي آية هانم تحياتي

23 March 2008 at 11:32  
Blogger Halawa said...

الخييييييط الرفيع

ازي سعادتك
أتفق مع سيادتك في تعديل النهاية
انما البداية أعتقد تقيلة
بس ساعات
بتبقى عايز النهاية فيها
مقاطع م البداية
علشان تبقى وحدة واحدة وتفكرك بالبداية
عشان يبقى الموضوع متماسك
متحش انها سرحت من الكاتب
مش عارف هيا جت معايا كده
لأنها اتكتبت على فترات
البداية من زمان
وحبة حبة مشيت
وزادت لحد النهاية مع فتحي وهدى

الحمد لله انها عجبتك
لأنها عزيزة عليا قوي القصيدة دي

حاجات الأمل والعمل
موجودة في الأغاني
اللي لسه مكتوبة من يومين ليوسف ومصطفى

وبعدين في نقطة لذيذة
مش عايز أفضل مندوب تسويق
الأفكار السامية النبيلة
كفاية عليا كده
عيش حلم على قدي
من توبي من مقاسي
معدتش ناقص بلالين ولا طيران لفوق


هي فكرة غريبة شوية
وقاسية
مبحبش نتطمن على فشل بعض
قلتهالك قبل كده
فبالتالي نحس
اننا في مركب واحدة
وان محدش سبق حد
فنوجد عذر لأنفسنااااااااااا
سووووووووري

شوفي وجهة نظري وممكن تسامحيني

تحيااااااااتي

23 March 2008 at 11:42  
Blogger Halawa said...

كاميليا حسين

ربنا يخليكي
ده من ذوق سعادتك
شرفتي وعقبال سيادتك

23 March 2008 at 11:44  
Blogger Halawa said...

بطوووووووووووطة

ازيك عاملة ايه؟
عقبالكم يارب قريبا
انا زهقت منكو بقى
يلااااااااا خلصونا
انتو هتتجوزوا في بلوج ايجار جديد
ههههههههههههه
يارب ترجعوا بالسلامة
ان شاء الله
ويديم عليكو وعلى كل أخواتنا
واصحابنا الأفراح دااااااااااايمن
شفتي القول المأثور بتاعك
عامل شغل ازااااااااااااااي
هههههههههههه
خلي بالك م الوااااااااااد

بالنوسبة لسرقة الكتابة
كان في راجل عظيم قاللي يوم كده
انا بكتب ليقرأني أصدقائي
ولو اتسرقت حاجة
هعرف أعمل غيرها
فسبيها ع الله
والحمد لله لو لقيتوا حاجة مسروقة
أكيد هتآكلوا صاحبها بسنانكو

ربنا يوفق الجميع
وشكرا جزيلا ليكي

23 March 2008 at 11:49  
Blogger السـيد شبـل said...

جميله جدا

24 March 2008 at 21:06  
Blogger Halawa said...

السيد شبل

ازيك ياريس
فينك من زمان
شكرا لزيارتك

25 March 2008 at 00:58  
Blogger momken said...

ازيك ابو يحى
طبعا انت عارف رائى مسبقا فى كلامك
بس انا الحقيقه مش موجود بصفه مستمر
بس عندى عتاب عليك

انا بحب الى يقرا كلمه عندى يقول رائيه
لانى فاتح المدونه للتواصل
الى يدخل يول وحشه
يقول كويسه
او يقولى سيبك من التدوين وافتح محل غزل البنات

مش عاوز حد يعلق تعلق عشر سطور
زى انا ما بعمل مع كل الناس
ابدا عاوز كلمه واحده
فهمنى يابو يحيى

تحياتى

31 March 2008 at 09:56  
Blogger محض روح said...

كميل البوست اوي
:)
الف مبروك

31 March 2008 at 21:50  
Blogger Halawa said...

ممكن باشا

زعلتني من نفسي أوي
بس صدقني ياباشا
بقالي فترة مش مظبووووط
زي ما كتبت في البوست
اعذرني
وكمان كان عندي امتحان جراحة
لسه مخلص امبارح
فبدأت أروق تاني
الحمد لله

وآسف لو انت زعلان بجد ما قصدش

تسلم اهتمامك
ويارب ترجع بالسلامة
ربنا معاك

1 April 2008 at 14:55  
Blogger Halawa said...

محض روح

ازيك دينا هانم
أخبارك
يارب تكوني بخير

تسلمي

1 April 2008 at 14:56  
Blogger bRoBaGaNdA said...

ماشى يا سيدى ...براحتك يا عم... ما خلاص بقى لقيتلك حجات من اللى اسمها مولهمات بقى غيرى وغير المعادى ...المه انك تكتب وترأعنا حجات تمام اقرا بووستى الأخير....سلامات

2 April 2008 at 00:07  
Blogger Halawa said...

بروبا جندا

شفت صورة البطاطا يا وااااااااد
أي خدمة هحطلك واحدة تانية كنت بتغسل فيها أطباق هههههههههههه

لا واللهي المعادي دي حتة من قلبي
مقدرش أنساهاااااااااا

حاضر هشوفه جاااااااااااااي

2 April 2008 at 04:38  
Blogger عالمى ازرق said...

وأبقى مفتاحك لذاتك
ويا تـنهـيدة سـكـاتك
حتى سجـادة صلاتـك
يكفيني أطول بيكي الأمان
ما نتي قـدَري من زمان


كل مره كلماتك بتكون احلى واجمل

- - - - - - - - -

الف مبروك
وعقبال مانشوف صورك ونباركلك كده يارب

4 April 2008 at 23:24  
Blogger Halawa said...

عالمي أزرق

بجد مش عارف أقولك ايه؟
اهتمامك بيحرجني قوي
شكرا ليكي

ودمتي بخيييييير

8 April 2008 at 19:21  

Post a Comment

<< Home