تعويـذه

تعويذة الضحك
اللي اترسمت على شفه نبيتي
مش قادره تكون
ترياق السم
من آخر مره اتشك
في روحه ب ناب أزرق
والقلب سامعله
دقه زياده
كما ترس وداير
من غير زيت
زغرط بالصدى
لسنين دخان
حازه سنانه
صابح يجرح
بشرار العشق..
وليلاتي تزوره
كهربا رباني
واصله في غيره
قاطعه في ذاته
بتحاول تجلي سواد السم
وتزيح أكاسيده
اللي اتمدت
والقلب معاند
من غير قصد
حالف يتحجب ضد العشق

قلب استانلس

ولإن النعمه
تقيله عليك
وقعت منك
فشت ع الأرض
واتبدر العقد المضفر
وخلصت أوام م التوطيه
وطلعلك بدل الأتب المتثبت
على نور الكدب
أجنحه ألامونيا
بتذيع هتافات
بصمة شوكك
ولاعدش بيغلط فيها اتنين
مبروك الروح
ملعون الروحه
مسموم النبضه
في قلب استانلس
من غير مصفاه
جاهز للبيع حته بحته
للي هيقرص يوم ع الزهر
محروق الكرت اللي هيشفعلك
تتحايل بيه وتخش الجنه

خراب

ملعونه الروح
اللي بتسكن تربة جوفك
دون استئذان
تفضل تحتلك
تتسرسب
زي السرطان
...
وآديلك فتره
بتحاول تعزم روحك
ع الأفراح بالغصب
بتدور وسط خراب الخلق
على أي ملايه
خرقه قديمه
شنطه بلاستك
تعمل بيها مرمه لقلبك
جايز تحييك
جايز تشتاق
ترجع بني آدم
وتصلي فروضك تاني في جامع
من غير قسوه
شبح المذؤوب
اللي طلعلك
مستحلي يخربش دود الأرض
ويقلب تاني جروح
اتدفنت سابق
فن التأويل الطياري
من مشهد واحد
حبة بويا في شوية قش
هيروحوا الصبح بطلعة شمس
يبقوا تراب
مش فارقه معاك
ترجع بني آدم
ولانتش باقي
ولامستنظر
تتشفى ب ريحة اللي اتعفن